Pioneer PLX-500: prètziu bàsciu e calidadi
E insa', in custu austu sardu callenti torraus a sciri apustis de unu sciacumannu de tempus, ca ndi teneus torra gana meda! Incarreraus cun una noa bella callenti de eriseru: sa firma giaponesa Pioneer chi, forsis, est sa prus firma manna de ainas po digei chi nci siat imoi, at presentau su pratu nou Pioneer PLX-500.
Est unu pratu "po inghitzai" ma, a s'imbressi de is paris de is àteras firmas, mancai chi còstat pagu tenit totu su chi serbit a unu digei o a un'ascurtadori normali de discus po inghitzai a ddu imperau luegus, sena de depi spendi àteru dinai:
- tiradura direta > 1.6 kgf・cm (est a nai ca est prus arta de cussa de su Technics 1200, su standard chi totu is pratus OEM pigant che a arriferimentu po su progetu);
- lestresa ±8 % (standard);
- strutura in allumìniu (su pesu est 10.7 kg);
- totu is aciuntas chi serbint po ddu imperai luegus (puntina, pannixeddu, gavetus àudio, gavetu usb, crobecu po ddu sarvai de su pruini, pesetus po ddu abalantzai);
- bessida àudio phono/line.
Totu po 349 èurus (iva cumpr.)! S'at a podi scioberai po finsas su colori (nieddu o biancu).
Unus cantus cunsiderus lestrus: Pioneer at cumprèndiu de diora chi du discu de vinili fiat "torrendi" e, duncas, chi serbiant pratus bonus po calisisiat umperadori (de su digei internatzionali chi bolit seguràntzia e calidadi a sa personi chi ascurtat is discus in domu chi bolit unu pratu bonu chi portat totu is aciuntas. Difatis, ocannu passau, nd'at bogau su Plx-1000,
est a nai su fradi manni de su 500 (matessi disìnniu, prus funtzionis, est a nai unu modellu "full optional") e, biendi su sucessu chi at tentu e sa domanda manna de pratus bonu prus baratus, at traballau po custu modellu "po inghitzai", donendi calidadi a prètziu bàsciu (una firma chi, po su chi pertocat a is mixer, est traballendi impari a is digeis po amanniai is modellus nous, pròpiu po ndi bogai ainas perfetas po su mercau, sena de circai de fai issa etotu su mercau).
Perou, a nai sa beridadi, custa dirigidura dd'iant pigada giai àteras firmas chi, mancai, po chistioni de nòmini e de dinai po sa pubricidadi, no nci funt arrennèscias a ndi bogai su pratu "po inghitzai" arreconnotu de totus. Una apitzus de totu sa Numark (de sa truma inMusic Brands, Inc. impari a Alesis, Akai, Denon, ecc.), chi un'annu a oi iat presentau su Numark TT250 USB ( 1.6 kgf・cm, ±10 %, aciuntas, scheda àudio usb aìnturu, allumìniu 7.5 kg).
Est, prus o mancu, su matessi pratu e còstat prus pagu (280-290 èurus). No ddu connòscit agiumai nemus, epuru Numark cun su TTX, su TT500 e su X2 giai nd'iat bogau pratus bonus chi, oindii, funt umperaus po finsas in is garas de digei. Ma forsis est peòpiu custu: at sèmpiri fatu pratus po digei e mai pratus OEM po inghitzai e, in prus, no at fatu una pubricidadi bona comenti a cussa de sa Pioneer chi, a sa fini, est unu colossu chi at ditzìdiu de no abarrai connota comenti a sa firma chi at imbentau is cd de digei (CDJ) e is mellus mixer cun 4 canalis ma de si-ndi pigai sa prusparti de su mercau cun ainas de dònnia fàscia e po (casi) totu is buciacas, umperendi una pubricidadi difìtzili a binci. Eus a biri comenti ant a arrespundi is atras firmas.
Custu est unu vìdiu chi amostat is Invisibl Skratch Piklz imperendi su PLX-1000 impari a su Technics 1210 e su mixer Pioneer S9 impari a su Z2 de sa Native Instruments po si fai una bidea de su livellu de is ainas noas de Pioneer:
Reloop Neon, su controlladori nou de Reloop
Oindii su mundu de is controlladori est, forsis, su prus setori mannu de is ainas po digei; Pioneer, Native Instruments, Akai, ecc., unu sciacumannu de genias po calisisiat abisòngiu! E, comenti a sèmpiri, custa borta puru sa firma tedesca Reloop ndi bessit cun un'aina chi punnat a sintetizai totu s'essèntzia de is prus ainas famadas de is àteras firmas, circhendi de nci-dda ponni in su mercau cun una pubricidadi fata beni e (siguramenti) cun prètziu bàscius. Su Neon, difatis, portat totu is prus caraterìsticas interessantis de sa NI Maschine, de su Pioneer DDJ-SP1 e de su Denon DN-HC1000S est a nai de cussus controlladoris "cumplementaris" a is consolle cun su mixer, is pratus/cdj e unu DVS (est tzertificau Serato DJ ma, craramenti, bandat beni po dònnia DVS sendi mapàbili).
Su vìdiu spricat beni totu is funtzionis chi tenit e totu su chi si podit fai, contendi-ndi e amostendi-ndi sa fatzilesa de umperu, s'ergonomia e s'assentu generali. Bellu meda, nudda de nai, ma unu contu est a ddas biri a is cosas, un'àteru est a ddas provai e personalmenti tengu dudas meda apitzus de sa lestresa de umperu e sa solidesas de is manaxili e de is tastus. Est berus puru chi Reloop no est prus una firma "giovunedda" e, comenti eus nau in s'ùrtimu artìculu, chi punnat a nci bintrai a faci manna in su mercau in custu momentu chi Vestax e Ecler ant lassau unu tretu mannu siguramenti at prodùsiu un'aina bona e est bellu meda a sciri chi nci at unu scioberu sèmpiri prus mannu e de ainas nci-nd'at po dònnia abisòngiu.
Coordinatzioni e… ginnàstica
Su nòmini est cambiau de Vajra a Chris Karns (chi est su nòmini suu a s'anagrafi) po chistionis de "arricimentu" spricadas beni in su giassu cosa sua:
"There are many reasons I have decided to make this choice. Nobody could ever say, spell, pronounce, or remember that old name. I have grown very tired of having to explain what it means, where it comes from, etc. I am actually amazed that I have been able to have any degree of success up to this point with such a terrible stage name.It is time to move on. My name is Chris Karns. That is my real name – it is who I am, and I am proud of that. I thought of a few different cute, clever or funny names to use, but I realized that there are a lot of artists who I look up to who go by their real names.".
Ma su nòmini, aici e comenti a sa bistimenta, no fait su campioni ma dda faint sa tènnica, su stili e sa fortza, comenti Vajra/Chris Karns at amostau in is annus e bincendi su DMC 2011!
In custu vìdiu chi at publicau oi etotu eus a podi biri de sa "sogetiva" de su digai ita bolit nai a fai unu scioru de unus cantus minutus a is pratus e totu su traballu de coordinatzioni e precisioni a livellu fìsicu e de cuncentratzioni a livellu mentali. A ndi pesai unu scioru est unu traballu de connoscèntzia, fantasia, imparu, allenamentu, coordinatzioni... e ginnàstica!
A si biri SERATO SCRATCH LIVE! Beni beniu SERATO DJ!
S'istadi est spaciau e su pàsiu nostu longu puru, ca fiat de diora chi femus firmus cun su blog. Chena de si perdi in arrexonamentus bambus andaus a biri luegus sa novidadi manna (ma manna diaderus!) in su mundu de is ainas po digei:
SERATO SCRATCH LIVE at a lassai sa cadira a SERATO DJ! Sa truma noa-zelandesa de Serato at comunicau de manera ufitziali su chi nosi femus giai fragau unus cantu mesis a oi, est a nai chi at a fai acurri su traballu insoru in s'amanniadura de unu programa sceti chi tengat totu is funtzionalidadis chi, po imoi, funt partzias intra de Scratch Live e de Serato DJ. Duncas, comenti est fàcili meda a cumprendi, Serato DJ at a tenni su DVS integrau! Difatis est unu programa giai cumpletu meda, chi iat pigau su postu de ITCH po essi imperau cun is controlladoris cumpatìbilis ma cun s'aciunta, a pagu a pagu, de totu is ainas de aìnturu chi in Scratch Live ddoi fiant giai (efetus, campionadori, ecc.) e cun s'acostamentu de sa bisura, prus crara e "lìmpia". A-i custu puntu, spaciada sa "sperimentatzioni" e castiadas is sceda de is umperadoris e de is tènnicus su scioberu est stètiu: in su benidori unu programa chi fait totu e po totu!
Po imoi no eus a intrai in is chistionis tènnicas e in is novidadis annuntziadas ma podeus giai fai unus cantu arrexonamentus apitzus de custas noas:
- sa "gherra" a su nimigu mannu Traktor sighit cun su matessi scioberu: unu programa sceti! Est una manera de arrisparmiai puru, ca a amanniai, a sighiri, a fai pubricidadi e a donai agiudu po duus o tres programa còstat meda e, in tempus de "crisi", est a si-dda arriscai tropu;
- sa truma de Serato no at a lassai sa "polìtica" cosa sua e su programa nou at a essi po debadas che a su bèciu;
- Serato at pubricau unu calendàriu (càstia apitzus) de is passus chi ant fai a cabu de su 2015, po lassai a totus su tempus de cumprendi comenti s'organizai po is agiorronamentus;
- s'agiorronamentu e s'amanniadura de Scratch Live at a sighiri po totu su 2014 e, in su matessi tempus, at a inghitzai sa "proa" de Serato DJ, giai de custu mesi de idas 2013 cun s'amparu de is mixer de sa RANE e Pioneer chi tenint sa scheda aìnturu e de is schedas SL2, SL3 e SL4;
- po su chi pertocat a s'hardware bèciu candu s'at a firmai Scratch Live no at a essi amparau de Serato DJ; seus chistionendi de SL1 e de su RANE TTM 57SL, ca tenint una tennologia bècia de 10 annus e sa truma de Serato at ditzidiu chi no fait prus a ddus amparai cun is programas nous;
- biu su calendàriu, chini umpèrat SL1 e/o 57SL at a tenni totu su tempus de s'agiorronai ma, a dolu mannu, no at a podi "a proai" Serato DJ; est craru chi unu contu est a cambiai sa scheda, un'àteru est a depi cambiai su mixer puru! Custu arrexonamentu de su bantaxu de sa scheda contras a su mixer tòrrat sèmpiri!
Ita àteru aciungi? Is novidadis aìnturu de Serato DJ funt mannas (8 cue point, efetus potentis a incuru de sa Izotope, duus campionadoris, funtzioni de SYNC, ecc.) e sa vìdiu-presentada ufitziali de sa Serato promitit unu programa stàbili meda (e Scratch Live ddu fiat giai!) e unu còixi de amanniadura a s'avanguàrdia (e po-i custu s'hardware bèciu no at a essi amparau). Est un'acostamentu "cumertziali" chi mi praxit meda e spereus chi sa "batalla" contras a Traktor at a inghitiai ambaduas is firmas a abasciai is prètzius de is ainas, deghinou at a essi unu barrancu mannu po chini cun custus programas/hardware nci trabàllat e, oindii, no ndi podit umperai àterus chi no funt aici professionalis!
Eus a sighiri totu sa cosa e a scriri àteru agiorronamentus... e a torrai a sciri in su blog cun arregularidadi!
Dj Izoh… ma diaderus?
Custu est su vìdiu de su scioru de 6 minutus bincidori de su DMC 2012: su giaponesu Dj Izoh est su campioni nou. Andendi prus atesu de sa noa sa pregunta chi mi deu postu luegus est stètia: ma diaderus? Tocat a nai sa beridadi: custu scioru est unu pogheddu ghetau apari, unu muntoni de sonus scuartaraus e de tènnicas bellas, certamenti, ma imperadas cun sbauladuras medas e custa cosa est strana ca scireus comenti funt pibincus is giaponesus (sa precisioni de Kentaro, Akakabe, Co-ma, ecc. est connota). Ita aciungi? Chi no eus biu is àterus sciorus po nai chi Izoh si-ddu est minèsciu custu tìtulu perou, chi mi pensu a Dj Precision apalas de Izoh, calincuna duda manna mi benit a conca. Sa chistioni, po mei, est chi, de candu su frantzesu Dj Fly at bintu su tìtulu in su 2008 at sinnau s'arruga noa de su DMC, cun d-unu scioru potenti e tènnicu a is prus livellus artus e, apustis, est stètiu dìficili meda a torrai agoa (ma giai Netik e Rafik, in su 2006 e 2007, iant comentzau a fai custa "rivolutzioni") e prus difìcili a ddi passai ananti. Su 2008 est stètiu s'inghitzu de s'epoca "moderna" de su DMC ma sa smèngua est stètia lestra meda... Chi iat participau torra, Dj Fly nd'iat bintu àterus 4 de tìtulus! Deu nau chi su DMC cust' 'orta at fatu unu pogheddu de sbianchimentu ca custu de Izoh no est unu scioru dìnniu de unu "campioni mondiali" e chini comenti a mei sighit is batallas de sèmpiri bai siguru chi dda pensat aici. Eis a biri chi de s'annu chi 'enit ant a torrai sciorus "a s'antiga" po sa musicalidadi impari a tènnicas sèmpiri prus lìmpias e arrefinadas.
Unus cantu cunsiderus comenti a sa sòlita: in s'epoca de su DVS, chi est bintrau de manera ofitziali in is batalla giai de diora, Izoh imperat Serato ma chena de mixer stravanaus! Scatuledda SL-3 (mi parrit) acapiada a unu mixer chi at a tenni assumancu 14 annus: su Technics SH-DJ1200, est a nai SU mixer de batalla ("The official world Dj Championship mixer"), mixer ofitziali de su DMC de su 1997 finsas a unus cantu annus a oi (e depiast imperai CUSSU!). Nci est pagu de fai: is giaponesus funt natzionalistus meda po is ainas de digei (Technics, Vestax, Pioneer, ecc.) e Izoh bincit su prèmiu assumancu po su scioberu de su mixer... e de is gavus! Difatis totu cussus gavetus coloraus e stravanaus a setzioni prana s'agatant in Giaponi sceti!
Abetaus àterus vìdeus, de sa World Supremacy puru, mancai, po cumprendi chi totu su chi eus scritu est unu scimpròriu o chi eus fatu s'arrexonamentu giustu.
DJ Vajra (USA) – Scioru bincidori de su 2011 DMC World Championship
Custu est su scioru de Dj Vajra chi at bintu su DMC World Championship 2011, sa prus batalla importanti chi unu digei podit fai. Torraus gràtzias a Vajra po su pregontu chi dd'eus fatu in su mesi de Cabudanni, candu no fiat ancora campioni de su DMC ma, siguramenti, ddu fiat giai de gentilesa! Castiai-si-ddi e gosai-si-ddu:
Stili lìberu de Dj Sputo
Eus pigau giai a Dj Sputo comenti a esempru po spricai unas cantu cosas tènnicas e, sigomenti ca issu est bravu meda, ddus faeus torra! In s'artìculu pubricau unas cantu diis a oi eus chistionau de IDA e, in prus chi Simo G de Tàtari (chi nd'est bessiu su de tres in sa finali) eus scritu chi iat participau un'àteru sardu puru, s'ollastrinu Dj Rash. Eriseru apu biu chi Dj Sputo puru at participau a sa batalla e, duncas, mi depu scusai cun issu po no ddu airi arremonau! E sigomenti nci at cravau una scarrafiada stravanada issu puru si nau ca si-dda podiat/depiat giogai po su palcu de is primus tres, e torru a fai s'abetiosu! Duncas, scusa-mì o Richard, sa prossimu bortu apu a ligi beni e mellus a totu is nòminis!
Andendi a is cosas tènnicas chi su vìdiu s'amostat nci nd'at una importanti meda chi si biri luegus: su schema. Puru chi est una scarrafiada "a stili lìberu" su schema est precisu e, in custu acasu, no ddoi funt sbauladuras o pagu precisioni; certamenti sa tènnica chi Sputo at amanniau cun annus de allenadas agiudat a sa precisioni ma deu nau chi issa a sola no abastat. Chi si-ddu castiais torra su vìdiu eis a biri chi su scusòrgiu est un'àteru: su rìtimu! Sighendi beni a sa basi e pighendi beni su rìtimu cun is manus (apitzus de discu e crossfader) su schema s'alladiat beni, sena de singurtus e bellu "fluenti" e custu, po sa prusparti, cumbinat cun su stili e ddu caraterizat! Difatis in ingresu puru po nai chi unu tenit stili narant "he got flow". Chi tui scis fai totus is prus tènnicas difìcilis, chi ses lestru meda, ecc. ma no sighis a su rìtimu beni (chi no est a andai a tempus sceti!) no as a tenni mai su "fluidu". E Richard ddu tenit, balla chi ddu tenit! Sena nimancu unu crab, sena de chirps a lestresa dòpia o de flares a cincumilla clichis andat fluidu pighendi su rìtimu e donendi musicalidadi a sa scarrafiada, totu trancuillu cun su fader a s'imbressi e cun sa manu chi dònnia tanti pigat su discu in su sesu contra-oràriu (is caraterìsticas suas principalis), ligeru ligeru e cun stili meda. "Issu tenit su fluidu".
Bravu Richard e scusa-mì torra!
Lèssicu 1.4
(su) SCHEMA: s'andamentu chi donaus a is scarràfius; su fueddu italianu puru est "schema" ma est cussu ingresu chi fait cumprendi luegus de ita seus chistionendi, poita ca est cussu chi s'imperat sèmpiri: "pattern".
(su/is) SCARRÀFIU(S) LÌBERU(S): candu, apitzus de una basi musicali, si scarrafiat de manera improvisada. Eus a podi nai puru "freestyle".
(su) CLICHI: est candu cun su crossfaer, su fader de su canali, su cambiadori de su canali opuru s'alluidori specìficu studaus e allueus luegus su sonu. Pigau de s'ingresu "click" (chi est onomatopèuticu) e furriau a sa grafia nosta; ma sigomenti ca "clich" iat a podi essi lìgiu mali (CH a tipu "cherries" o "chili") deu nau de aciungi in sa scriidura sa I prostètica puru . Duncas "CK"="CHI" e naraus CLICHI(S).
(su) CAMBIADORI: est una spècia de alluidori chi podit tenni duas o prus positzionis e serbit po cambiai sa mitza sonora de unu canali àudio (po esempru de Phono a Line). In su passau, sigomenti ca is mixer fiant fatus po amisturai sa mùsica, po scarrafiai s'imperaràt s'alluidori faendi su clichi passendi de Phono (chi ndi arribàt su sonu de su discu) a Line (chi fiat sbuidu!). Arregordu cun praxeri chi su "clichi" faiat in so sonu puru, ca su passàgiu lestru e arripìtiu intra de Phono e Line fait una scarrighedda de "massa elètrica"! Custa costa si podit intendi beni in is discus Rap finsas a sa mitadi de is annus '90.
DMC WORLD DJ CHAMPIONSHIPS 2001 – SA FINALI DE LONDRA
Su 6 e su 7 de su mesi de Ladàmini, in Londra, s'ant a fai is finalis de su DMC WORLD DJ CHAMPIONSHIPS 2011, categorias:
6 minùtus (scioru de DMC clàssicu)
Supremacy (a disfida)
Team (trumas)
Eus a cumentai beni apustis totu sa cosa, candu s'at a sciri e chini totu at bintu. Po imoi bollu a fai sceti unu cunsideru: in sa finali ddoi funt digeis de Kènya, Taiwan, Indonesia, Puerto Rico...e deu nau chi ant a si fai balli puru! Est sa globalizatzioni, o piciocus, e in sa mùsica est una cosa bona meda!
Pregontus: Dj Vajra (U.S.A. DMC Champion 2011)
E custa borta mi-nci scapat s'arrisu diaderus! Teneus s'onori mannu de pubricai unu pregontu fatu a unu digei "potenti meda", su campioni friscu-friscu de su DMC U.S.A. 2011 (chi si-dda at a batallai a sa finali mondiali in Londra in su mesi chi intrat), unu grandu digei de batalla chi tenit aìnturu sa scola bècia e dda portat in sa scola noa, scarrafiadori precisu, gioguladori fantasiosu e sceberadori de crassi de hip hop e funk: Chris "Dj Vajra" Karn de Denver (Colorado). Ita àteru de nai? Chi torru gràtzias meda a Verònica Atzei po s'agiudu cun s'ingresu! Imoi, perou, andaus a ligi su pregontu:
Saludi Chris e beni beniu in su blog de "Su Digei", su primu blog apitzus de chistionis tènnicas de digei (e no sceti!).
1 - SU DIGEI: Po mei ses unu de is mellus "digeis de batalla" de su mundu e m'arregordu chi Q-Bert iat nau chi ses unu de is suus "digeis de DMC" preferius. Ti bollu pregontai unu parrimentu personali meda: in su 2011 esistit ancora su digei de batalla in cumpetitzioni e creadori? Poita ca mi parit chi is tennologias noas ant creau làcanas creadoras fortis in su matessi tempus chi ant smenguau is làcanas tènnicas.
R - DJ VAJRA: Deu pensu chena de dudas chi su digei creadori e in cumpetitzioni bivit ancora. Faendi umperai is tennologias noas in is batallas si funt donadas a is digeis unu sciacumannu de maneras de nci sonai comenti mai iant tentu ananti. Su DVS at cambiau su giogu a su mellus.
2 - SU DIGEI: Abarraus apitzus de is chistionis tènnicas (chi nosi praxint aici meda!): tui umperas a Serato, cun su TTM-57 sèmpiri prontu a s'azioni. Cali est su prus bantaxu mannu chi as tentu de-i custu sistema e cali su prus sbantaxu mannu?
R- DJ VAJRA: Sa mellus cosa umperendi a su Serato impari a su 57 est chi tenis a totu is controllus in su mixer. Sa cosa lègia est chi no ddoi funt teclas bastantementi e depis cambiai de truma in truma po funtzionis diferentis.
3- SU DIGEI: Su frunimentu cosa tua is cuncordau de manera diferenti candu sonas cun trumas "hip hop"?
R - DJ VAJRA: Seu sonendi dònnia tanti cun d-una banda de Denver chi ddi narant "Big Wheel", e candu nci sonu impari umperu a unu pratu, solitamenti. Candu tenis unu sonadori de arratantina forti meda, su giogulamentu sonat comenti a una cosa no professionali.
4 - SU DIGEI: Chistionendi di hip hop: est una genia de mùsica chi ses liau meda ma ddu ses a sa matessi manera a su funky. Est berus? Candu depis fai una scalita chi ponit impari a s'hip hop e a su funky su sceberu de sa filera de is cantzonis est liada prus a sa lestresa o is sonus insoru?
R - DJ VAJRA: Mi praxint medas genias de mùsica, hip hop e funky incluius. Sa lestresa contat in su sceberu de is cantzonis de amisturai, ma tocat a nci traballai apitzus de is sonus puru. Fatzu unu sciacumannu de proas e de faddinas candu ddus pongu aparis. S'arresultau a s'acabu depit sonai beni in totu su chi fatzu.
5 - SU DIGEI: Apu fatu unu pregontu a Dj Angelo (grandu digei ingresu) e issu at nau una cosa chi mi praxit: "No mi potzu arriscai de biri a genti arròscia in s'interis chi seu faendi unus milli gioghitus, est mellu a tenni unu spetàculu cun su 75% de mùsica e su 25% de scioru". Ses diacòrdiu? Tenis su matessi acostamentu?
R - DJ VAJRA: Dipendit de sa genti, podit essi de prus o de amancu, perou eja, seu deacòrdiu.
6 - SU DIGEI: Ita nosi naras de is primus seti mesis de su 2011 cosa tua de s'ala professionali? As fatu medas cuncertus?
R - DJ VAJRA: Ocannu mi seu cuncentrau meda apitzus de is batallas, ma apu fatu calancunu cuncertu togu puru. Custu est stètiu siguramenti su mellus annu de sa carrera mia de digei, e speru de sighiri a otenni de prus.
7 - SU DIGEI: Torraus a is batallas: su DMC Online Dj Battle parit una grandu cumpetitzioni e su fatu chi as participau tui puru mi torrat una cunfirma de traessu. Cali est s'impressioni tua generali? Calincunu de timi?
R - DJ VAJRA: No seu siguru a su 100% chi apu a sighiri ancora in sa batalla in s'arretza, poita ca apu bintu is finalis DMC USA e seu giai prontu po andai a-i cussas mondialis. Is àterus batalladoris funt totus bonus meda, ma deu no timu a nemus.
8 - SU DIGEI: Calincuna inditadura po is giòvunus chi nosi ligint?
R - DJ VAJRA: Traballu tostau, passioni e costàntzia a s'acabu ant a pagai.
9 - SU DIGEI: Ses bènniu mai in Sardìnnia? Ita ndi pentzas de s'ìsula nosta?
R - DJ VAJRA: No seu stètiu mai in Sardìnnia ma m'iat a praxi MEDA a nci andai una dii. Seu sìguru chi innia est bellu meda!
10 - SU DIGEI: S'annu chi benit is Denver Nuggets ant a agafai is playoffs?
R - DJ VAJRA: No creu chi is Nuggets ant a fai is playoff s'annu chi benit. Trupu trumas fortis in su West, e is Nuggets no tentint "star" intra de is giogadoris. No podis binci chena de unu "go-to" giogadori a s'atacu.
SU DIGEI: Gràtzias meda po sa gentilesa e sa passièntzia. Speraus de ti biri luegus in Europa!
DJ VAJRA: Gràtzias!!
Versioni ingresa de su pregontu.
Avotai genti, avotai!
Chi si fait praxeri podeis avotai a Dj Cordella chi est intra de is 22 digeis chi funt lòmpius a-i custa torrada. Su 30 de Austu is 10 digeis chi ant a airi arriciu prus avotus ant a si-dda gherrai in d-una batalla manna finali, chi ndi at a bogai su primu "DMC Online DJ Champion 2011". Su Digei narat de avotai a Dj Cordella, ca ddi iat fatu unu pregontu de pagu e nosi pensaus chi si-ddu merescit custu avotixeddu! Ajò, amollai-si-nci!
Custu est su bivimentu po avotai.
Posts Nous
- Pioneer PLX-500: prètziu bàsciu e calidadi
- S’umperu de is ainas: mixer, pratu, DVS, controlladori e sintetizadori
- Reloop Neon, su controlladori nou de Reloop
- Vestax e Ecler serrant: s’acabu de un’era
- DMC World Final 2014: is arresultaus
Cumentus nous
- bei Dj Sputo e s’umperu de sa tènnica „a s’imbressi“
- bei Dj Sputo e s’umperu de sa tènnica „a s’imbressi“
Genias
- Ainas
- Batallas
- Comunicatzionis
- Incraramentus
- Novas
- Pregontus
- Presentadas
- Programas
- Tènnicas
- Uncategorized
- Vìdius
Amigus
- A.Ca.Li.Sa
- Acadèmia de su Sardu
- Amos Cardia
- Barbara Picci
- Canis Sardus Antigus
- Comitau.org
- Ditzionàriu.org
- Dj Angelo [UK]
- Dr. Drer & Crc Posse
- Electroneddas
- ilDeposito.org
- Ivo Murgia
- Lollove
- Sardìnnia Stravanada
- Stèvini …su chercu
- Vito Biolchini