Pioneer PLX-500: prètziu bàsciu e calidadi
E insa', in custu austu sardu callenti torraus a sciri apustis de unu sciacumannu de tempus, ca ndi teneus torra gana meda! Incarreraus cun una noa bella callenti de eriseru: sa firma giaponesa Pioneer chi, forsis, est sa prus firma manna de ainas po digei chi nci siat imoi, at presentau su pratu nou Pioneer PLX-500.
Est unu pratu "po inghitzai" ma, a s'imbressi de is paris de is àteras firmas, mancai chi còstat pagu tenit totu su chi serbit a unu digei o a un'ascurtadori normali de discus po inghitzai a ddu imperau luegus, sena de depi spendi àteru dinai:
- tiradura direta > 1.6 kgf・cm (est a nai ca est prus arta de cussa de su Technics 1200, su standard chi totu is pratus OEM pigant che a arriferimentu po su progetu);
- lestresa ±8 % (standard);
- strutura in allumìniu (su pesu est 10.7 kg);
- totu is aciuntas chi serbint po ddu imperai luegus (puntina, pannixeddu, gavetus àudio, gavetu usb, crobecu po ddu sarvai de su pruini, pesetus po ddu abalantzai);
- bessida àudio phono/line.
Totu po 349 èurus (iva cumpr.)! S'at a podi scioberai po finsas su colori (nieddu o biancu).
Unus cantus cunsiderus lestrus: Pioneer at cumprèndiu de diora chi du discu de vinili fiat "torrendi" e, duncas, chi serbiant pratus bonus po calisisiat umperadori (de su digei internatzionali chi bolit seguràntzia e calidadi a sa personi chi ascurtat is discus in domu chi bolit unu pratu bonu chi portat totu is aciuntas. Difatis, ocannu passau, nd'at bogau su Plx-1000,
est a nai su fradi manni de su 500 (matessi disìnniu, prus funtzionis, est a nai unu modellu "full optional") e, biendi su sucessu chi at tentu e sa domanda manna de pratus bonu prus baratus, at traballau po custu modellu "po inghitzai", donendi calidadi a prètziu bàsciu (una firma chi, po su chi pertocat a is mixer, est traballendi impari a is digeis po amanniai is modellus nous, pròpiu po ndi bogai ainas perfetas po su mercau, sena de circai de fai issa etotu su mercau).
Perou, a nai sa beridadi, custa dirigidura dd'iant pigada giai àteras firmas chi, mancai, po chistioni de nòmini e de dinai po sa pubricidadi, no nci funt arrennèscias a ndi bogai su pratu "po inghitzai" arreconnotu de totus. Una apitzus de totu sa Numark (de sa truma inMusic Brands, Inc. impari a Alesis, Akai, Denon, ecc.), chi un'annu a oi iat presentau su Numark TT250 USB ( 1.6 kgf・cm, ±10 %, aciuntas, scheda àudio usb aìnturu, allumìniu 7.5 kg).
Est, prus o mancu, su matessi pratu e còstat prus pagu (280-290 èurus). No ddu connòscit agiumai nemus, epuru Numark cun su TTX, su TT500 e su X2 giai nd'iat bogau pratus bonus chi, oindii, funt umperaus po finsas in is garas de digei. Ma forsis est peòpiu custu: at sèmpiri fatu pratus po digei e mai pratus OEM po inghitzai e, in prus, no at fatu una pubricidadi bona comenti a cussa de sa Pioneer chi, a sa fini, est unu colossu chi at ditzìdiu de no abarrai connota comenti a sa firma chi at imbentau is cd de digei (CDJ) e is mellus mixer cun 4 canalis ma de si-ndi pigai sa prusparti de su mercau cun ainas de dònnia fàscia e po (casi) totu is buciacas, umperendi una pubricidadi difìtzili a binci. Eus a biri comenti ant a arrespundi is atras firmas.
Custu est unu vìdiu chi amostat is Invisibl Skratch Piklz imperendi su PLX-1000 impari a su Technics 1210 e su mixer Pioneer S9 impari a su Z2 de sa Native Instruments po si fai una bidea de su livellu de is ainas noas de Pioneer:
Batallas de QSU
Sendi chi est unu maistu, forsis su prus maistu mannu, Dj Qbert puru tenit sa scola cosa sua ma, sigomenti ca est unu professori stravanau, est un'universadi: Qbert Skratch University! In su benidori eus a scriri un'artìculu specìficu apitzu de is scolas de digei, ca no funt stètias pesadas oindii ma esistint de meda tempus. Poi imoi bosi 'ollu sinnalai chi sa QSU est faendi unas cantu batalleddas apitzu de is tènnicas; "transformer", "stabs", "3 click flare", ecc., cun sa fòrmula de is vìdius integaus cun Youtube o cosas aici. Su giugi, mancu a ddu nai, Qbert etotu.
Cunsiderus lestrus: calincunca cosa de didàtica e de formatzioni gei dda cumprendu e mi parrit chi custa siat una manera bona meda de spruinai is "basis" de su scratch e de infogai is studiantis po ddas studiai, aguantendi sèmpiri cussu sentidu "de batallu" chi su digei-scarrafiadori depit tenni e pensu puru chi siat una manera bona de si fai pubricidadi, ca su "testimonial" mannu no abastat e tòcat a ingustai sa genti cun sa parti "ativa" de sa scola, in prus chi sa parti "passiva" de is letzionis. Ah, femu scarescendi-mì de bosi-ddu nai: po participai tòcat a ddoi essi assentaus a sa QSU! Eh, ddu sciu, nci seu abarrau mali deu puru... 90 $ po 3 mesis de scola a bintrada lìbera in su giassu po is ainas, is vìdios, is letzionis e sa possibilidadi de chistionai e àiri consillus de Qbert e de is maistus famaus de sa scola. No nci at dinai? E insa' passièntzia! Nimancu deu seu assentau... faeus una batalla intra 'e nosu etotu e si spassiaus puru! Po debadas!
BEAT4BATTLE TV: de sa Rùssia sa de duus puntada
Pustis de su sciùsciu de s'Unioni Soviètica e cun s'amanniamentu de Internet e de sa comunicatzioni cun s'arretza, s'est abertu totu unu mundu de artistas de s'Est potentis meda, prenus de bideas e de sonus nous gràtzias/po nexi de-i cussu isulamentu propiamenti. Su sinnu BEAT4BATTLE intra de is digeis bolit nai vìdius stravanaus, scenas de batallas, freestyle, proas in domu e totus cussas situatzionis "no formalis" chi s'amostant s'àtera vida de su digei e, apustis de vìdios de s'Europa e de su Giaponi funt arribendi cussus de sa Rùssia, in d-una TV beni cuncordada, tènnica e spassiosa puru. Custa est sa de duus puntadas, gosai-si-dda:
Batallas in sa retza de DMC – sa de cuàturu noas
In s'interis chi femus faendi pregontus aforas de sa Sardìnnia e chistionendi de cosas tènnicas meda, sa batalla "DMC Online Dj Championships" fiat sighendi su tretu suu e, duncas, andaus a castiai unu pogheddu aundi est lòmpia e cali est sa situatzioni: a sa de dexi torrada est "Dj Fong Fong (Frantza)" chi bincit, cun d-unu scioru stravanau! Castiai-si-ddu circhendi a no arriri tropu e a si gosai sa fantasia, sa precisioni e sa tènnica de-i custu macu:
Passat a sa torrada afatanti "Dj Snayk Eyez (USA)", dj underground de batalla chi no s'intendiat de diora (fiat connotu meda unus dexi annus a oi), chi at amostau stili de scola bècia amesturau a tènnicas noas cun s'acostamentu cràssicu de is digeis americanus chi funt "nàscius" in is annus '90 aìnturu de su mundu de s'hip hop, candu is batallas fiant liadas meda a-i cussa cultura:
Sa giuria, comenti a su sòlitu, fiat de ddi portai arrespetu mannu:
DJ CO-MA (Giaponi)- DMC Battle For World Supremacy Champion 2006
Pro Zeiko (Germània) - DMC Battle For World Supremacy Champion 2005
Cutmaster Swift (Arrènniu Uniu) - DMC World Champion 1989
Batallas in sa retza de DMC – sa de tres noas
Sa batalla "DMC Online DJ Championships", chi seus sighendi de custu blog, est lompendi a essi interessanti meda, o piciocus! Un'àtera sentèntzia cun spantu: "Ritchie Ruftone (UK)" est su bincidori e "Dj Cordella (ITA)", italianu pulliesu de Taviano (LE), passat a sa torrada afatanti comenti a su mellus apalas de su primu!. M'eis a nai: "e poita totu custu infogu?". Pruschetotu poita ca Cordella est grandu sperimentadori e presentadori de ainas de digei (Alarmusic, Numark, ecc.) e puru poita ca tenit cussu "tocu" de scola bècia in is sciorus cosa sua chi mi fait praxeri meda a intendi. Balla, custa borta puru sa giuria fiat cosa de timi:
DJ Shiftee (USA) - DMC World Champion 2009 / DMC Battle for Supremacy Champion 2007
DJ Yasa (Japan) - 4 x DMC World Team Champions
DJ Dopey (Canada) - DMC World Champion 2003
Lèssicu 1.0
(sa) PRESENTADA: candu unu digei spertu provat un'aina e ndi scriri ita ndi pentzat, chi siat po unu blog tènnicu, unu giorronali de su setori professionali, ecc.. In su mundu de su digei is presentadas e is vìdeo-presentadas funt importantis meda poita ca medas bortas si tocat a comporai un'aina in s'arretza, chena de dda podi provai.
Batallas in sa retza de DMC – sa segundu noa
A s'acabu de sa segundu torrada nci funt bessius duus digeis chi ant a si-dda gherrai in sa finali de Austu de sa batalla "DMC Online DJ Championships": "Dj Rasp (UK)", chi est su bincidori, e "Loop Skywalker the turntable Jedi (UK)", chi passat a sa torrada afatanti comenti a su mellus apalas de su primu (britànnicu issu puru). Is sciorus de custus duus piciocus no m'ant fatu sartiai de sa cadira perou chi custa giuria at ditzidiu aici mi tocat a mi citiri:
DJ Noize - 1996 DMC World Champion
DJ Kentaro - 2002 DMC World Champion
DJ Pfel (C2C) - 4 x DMC World Team Champion
Lèssicu 0.9
(sa) GIURIA: in dònnia batalla de digeis sa giuria avotat is sciorus e pigat is detzididuras. Chi sa batalla est internatzionali-ofitziali is arrègulas ant a essi is matessis in dònnia logu (po es.: su DMC in Tailàndia at a essi fatu comenti a su DMC de su Canada).
Batallas in sa retza de DMC – sa primu noa
Duncas: sa batalla "DMC Online DJ Championships" est inghitzada e sa primu torrada tenit giai is bincidoris, chi ant a essi arrenomenaus giòbia su 17 de custu mesi. Sa curiosidadi est manna poita ca, comenti nàrat sa noa ofitziali de su DMC, no scireus ita at a fai chini nci at a bessiri: si-dda ant a gherrai cun su matessi video? Ant a arregistrai duus minutus nous? Opuru calincunu at a lassai perdi? Deu apu castiau totu is video (gana meda ndi tenemu, berus?) e avotau chena de generosidadi e, a nai sa beridadi, s'ùnicu chi at fatu duus minutus de fogu est stètiu Dj Unkut (Germània), chi cun d-unu scioru de lestresa, precisioni e tènnica apitzus de is sonus cuncordaus de Le Jad (produsidori famau meda po is basis potentis, siat po is batallas chi po nci arrepai asuba) s'est guadangiau is cincu steddus cosa mia. Castiai-si-ddu:
Tanti po essi precisu, si fatzu apubai ca est imperendi su mixer nou de sa Vestax, su PMC 05 pro IV (gei ddu eus a biri prus ananti) e Traktor Scratch Pro impari a su controlladori Maschine (totu e duus de sa Native Instruments); no creu chi ddu fetzat po debadas ca Vestax, Zoo York e àteras firmas puru ddi faint de amparadoris (castiai is apositzus in su sprigu!).
Po torrai a sa chistioni de su post e dda serrai cun lestresa: sa DMC si fait sciri chi at tentu 50.000 vìsitas in duas cidas e chi at avotau genti de: U.S.A., UK, Germània, Corea de su Mesudii e natzionis chi no ant participau mai a su DMC, che Colòmbia e Cile, chi si-dda funt gherrada beni puru!
Insaras, abetaus a su 17 de Martzu e bireus chini at a passai a su segundu turnu. Nosu bos'eus a donai noas dònnia borta, cun sa speràntzia chi siat una batalla sèmpiri prus potenti e prena de novidadis tènnicas e musicalis.
Lèssicu 0.7
(su) SCIORU: is batallas de digei funt, pruschetotu, una filera de "routine"; sa tradusidura precisa iat a depi essi "andatzu" ma si sciri ca a custu fueddu ddu imperaus in àterus tèssius. Duncas "scioru" podit essi una solutzioni.
(su) AMPARADORI: est su chi ddi nàrant "SPONSOR", chi ndi benit de su latinu "sponsor"=fiantzeri (verbu "spondere"=promiti cun solennidadi). Eus a podi nai "su sponsor" puru ma chi nci-dda faeus a sceberai unu fueddu sardu est mellus.
Batallas de digei in sa retza
Chi imoi seus bivendi s'era de Internet dd'eus cumprendiu de diora e, difatis, est difìcili meda a si pensai de podi cuncordai spainamentu de mùsica-promo, circa de datas po sonai, tenni cuntatus, ecc. chena de imperai sa retza chi, de prus, chi est beni imperada s'at a fai allogai dinai puru! Po unu digei est cosa stravanada a podi fai puru àteras cosas chi donant infogu mannu, ideas e materiali po sonus nous. Tanti po nai:
- imperendi a Skype, MSN opuru calisisiat “sistema de arrecadu subitanu” acapiendi a sa computera una bessida de su mixer (mancai su Booth) e cun d-una webcam si podeus fai una pariga de scratches impari a un'amigu arromanu o spanniolu, faendi “pregunta e arraspusta” e studiendi-ndi is tènnicas in s'interis chi si seus spassiendi, chi siat a su noti cun is cùfias opuru a su domìnigu de a merii cun is càscias a totu pompa;
- imperendi a Soundcloud, po carrigai arregistratzionis e ddas spainai de manera chi totu is cumbidaus a s'ascurtu potzant intendi cantu seus togus a fai passàgius longus unus sessantacuàturu bàtidus;
- scarrighendi-sì "loopers", basis e sonus po fai provas e traballus nous, sèmpiri prus arricus e personalis.
E imoi, arribendi a sa chistioni chi m'at fatu sciriri a custu post, nci at una novidadi manna e stravanada: sa "batalla in sa retza"! No est cosa noa-noa, ca giai de una pariga de annus sa sfida intra de digei, imperendi a Youtube, fiat lompendi a essi cosa sèria e batallas che "WTK Worldwide Scratch Battle" e àteras funt atòbius abetaus de digei famaus puru (Dj Muzzell, LigOne, Kurteek, ecc.) e de unu muntoni de genti, ca a participai est fàcili: ti depis arregistrai cun sa webcam, faendi sa presentada cosa tua, intra de su tempus stabilèssiu e asuba de sa basi "ofitziali". Totu su mundu t'at a podi biri e, a s'acabau, una giuria at a ditzidi chini est su bincidori. E insaras sa DMC-World Dj Championships, chi giai de is annus '80 fait dònnia annu sa prus batalla importanti chi premiat is campionis de su mundu, ocannu at organizau sa primu batalla in sa retza cosa sua: sa DMC ONLINE DJ CHAMPIONSHIP. Chena de intrai tropu in is particularis (ligei-sì s'arregulamentu chi teneis tempus e gana) si potzu nai giai chi totus is assentaus intra de su 14 de Friàrgiu chi ant carrigau su video insoru ant a essi avotaus, inghitzendi de su 3 de Martzu, de totus is chi s'ant assentai po custa tenta. Dònnia duas cidas s'at a avotai, finsas a su 30 de Austu candu ant a essi ofitzialis is 10 sceberaus po sa finali chi, su 5 de Cabudanni, at a nai chini est s'urrei de sa batalla! Deu no mi seu assentau ancora po avotai (siguramenti no bollu batallai, ca no seu bonu a fai custas cosas) ma no biu s'ora de mi gosai sa bisura de genti de totu su mundu amachiendi-sì cun duus pratus e unu mixer e boghendi-ndi sonus stravanaus! Sa batalla, no si-ddu scaresceus, est cosa importanti meda in su mundu de su digei "hip hop"...puru chi est in sa retza!
Lèssicu 0.6
(su) SISTEMA DE ARRECADU SUBITANU: funt totu cussus programas chi pirmitint de comunicai luegus scriendi a tipu "chat" e, po sa prusparti, puru chistionendi-sì cun su micròfunu e is cufias e castiendi-sì cun sa webcam.
(su) BOOTH: est una segundu bessida de su mixer chi, a tipu su Master, arrègulat unu volùmini. In ingresu ddi nant aici ca iat a depi essi sa bessida po is càscias de sa "gabina" de su digei, diferentis de cussas acapiadas a su Master. Cumbenit a ddu lassai aici, comenti as fatu totu is àteras lìnguas.
(sa) PREGUNTA E ARRASPUSTA (P/A): chistionendi de digei chi faint "scratch" est una manera de si sfidai opuru de fai allenamentu, arretroghendi-sì apitzus de una basi dònnia tanti de bàtidus. Su nòmini est tradusidura de s'ingresu "question & answer (Q&A)". In italianu puru s'imperat meda "botta e risposta".
(su) PASSÀGIU: sa transidura intra de una cantzoni e s'àtera candu ddas seus amesturendi-ddas. In italianu est "passagiu" a su pròpiu, ca si cumprendit chi no seus chistionendi de màchinas de su tèssiu.
(su) LOOPER: ndi benit de loop (fueddu chi eus giai biu). Funt progràmas piticus, fatus a "flash" opuru "html" chi tenint unus cantu de loop in d-una fentana fata cun gràfica. Funt pràticus meda, ca su digei podit sceberai e cambiai luegus su loop po fai allenamentu cun su scratch. No ddu furriaus, poita ca, comenti eus biu giai po "loop", ndi bessint girus de fueddus chi trumbullant.
Controlladoris tragaditzus: AKAI LPD8
Est giai de unus cantu de tempus chi in sa consolle de su digei bieus fitianamenti sa computera, in prus chi is pratus, is ligidoris de cd e su mixer, poita ca is programas po su controllu digitali de sa mùsica (siat cun is discus chi cun su cd) funt lòmpius a èssiri s'arrègula po unu nùmuru mannu de chistionis; foras de sa comodidadi siguramenti nci at s'arraxoni chi podeus fàiri unu sciacumannu de cosas in prus: efetus, loops, lìstas longas de cantzonis, ecc. e ddu podeus fàiri beni. Ma cali est, duncas, su chi amancàt? Pruschetotu una spècia de ainas po ndi controllai sa computera, mancai flessìbilis in sa programatzioni. E insaras bieus controlladoris USB acanta de is computeras, cun tastus, manaxilis, curreus e luxis puru! Duncas deu puru ndi apu comporau unu: su “AKAI LPD-8”! No si bollu trumbullai tropu cun chistionis tènnicas ma si potzu nai a lestru poita ca est un'aina bella meda:
- ndi pigat sa currenti de sa USB
- tenit 8 “pads”
- tenit 8 manaxilis cun cursa finia
- 4 pàginas de programa (est a nai ca funt 32 pads/manaxilis in totu)
- est “plug & play”, siat asuta de Windows chi de OSX
- tenit is luxis po gurnisa de is pads (duas maneras)
Sa calidadi de is materialis est arta, comenti si spetat a is ainas prodùsias de Akai chi, abarrendi intra de is firmas giaponesas, at amelliorau un'idea de sa Korg, su “nanoPAD” (chi at presentau sa segundu versioni a su NAMM 2011 in Califòrnia in su mesi de Gennàrgiu). Imoi su “trend” est ghetau e totu is firmas funt faendi conrolladoris aici piticus poita ca funt tragaditzus e nci-ddus podeus pònniri in sa bussa de digei puru chi ndi depeus pigai s'ariopranu e ca funt flessìbilis e aportaus, praticamenti, de dònnia programa. Deu ddu imperu, po sa prusparti, po ndi controllai Serato Scratch Live, mapendi-ddu aici:
- is manaxilis cuntrollant is efetus (filtrus, flanger, delay e “repeater”);
- is pads funt po fai su loop a lestru, po ndi cambiai sa manera de ligidura (absolute, relative, internal) e po sonai, mancai, unu loopixeddu de sirena (ca nci stait sèmpiri beni!)
Dda serru narendi chi est un'aina chi costat pagu (unus 55 èurus) ma chi ndi balit de prus siat po sa calidadi de is materialis chi po sa flessibilidadi e est su primu contolladori tragaditzu chi, puru chi est aici piticu, tenit manaxilis e pads.
Lèssicu 0.4
(su) CONTROLLADORI: in ingresu est "controller"; funt cussas ainas chi (bia MIDI cun s'analògico, sa USB e sa Firewire) pirmittint de controllai àteras ainas. In italianu est abarrau "controller".
(su) PAD: funt una spècia de "tastus dinàmicus" cuadraus; deu nau de ddu lassai aici, ca sa tradusidura no est fàcili. Giai in italianu est difìcili, ca ndi bessint fueddus comenti a: "blocco, cuscinetto, piattaforma, ecc.". Chi nau "su pad" assumancu no m'ant a castiai mali.
(su) LOOP: sa tradusidura iat a dèpiri èssiri "perìodu", est a nai unu sonu chi torrat aguali finsas a candu no ddu firmaus. Ma "loop" est unu fueddu aici connotu chi cumbenit a lassai s'ingresu innoi puru (comenti, craramenti, at fatu s'italianu).
TRAGADITZU: ing: "portable", ita. "portatile"; ma in sardu nci at su verbu "tragai" e, duncas, podeus imperai s'agetivu (gràtzias a Oresti Pili chi m'at spricau custa cosa po is computeras).
Posts Nous
- Pioneer PLX-500: prètziu bàsciu e calidadi
- S’umperu de is ainas: mixer, pratu, DVS, controlladori e sintetizadori
- Reloop Neon, su controlladori nou de Reloop
- Vestax e Ecler serrant: s’acabu de un’era
- DMC World Final 2014: is arresultaus
Cumentus nous
- bei Dj Sputo e s’umperu de sa tènnica „a s’imbressi“
- bei Dj Sputo e s’umperu de sa tènnica „a s’imbressi“
Genias
- Ainas
- Batallas
- Comunicatzionis
- Incraramentus
- Novas
- Pregontus
- Presentadas
- Programas
- Tènnicas
- Uncategorized
- Vìdius
Amigus
- A.Ca.Li.Sa
- Acadèmia de su Sardu
- Amos Cardia
- Barbara Picci
- Canis Sardus Antigus
- Comitau.org
- Ditzionàriu.org
- Dj Angelo [UK]
- Dr. Drer & Crc Posse
- Electroneddas
- ilDeposito.org
- Ivo Murgia
- Lollove
- Sardìnnia Stravanada
- Stèvini …su chercu
- Vito Biolchini