Stili lìberu de Dj Sputo
Eus pigau giai a Dj Sputo comenti a esempru po spricai unas cantu cosas tènnicas e, sigomenti ca issu est bravu meda, ddus faeus torra! In s'artìculu pubricau unas cantu diis a oi eus chistionau de IDA e, in prus chi Simo G de Tàtari (chi nd'est bessiu su de tres in sa finali) eus scritu chi iat participau un'àteru sardu puru, s'ollastrinu Dj Rash. Eriseru apu biu chi Dj Sputo puru at participau a sa batalla e, duncas, mi depu scusai cun issu po no ddu airi arremonau! E sigomenti nci at cravau una scarrafiada stravanada issu puru si nau ca si-dda podiat/depiat giogai po su palcu de is primus tres, e torru a fai s'abetiosu! Duncas, scusa-mì o Richard, sa prossimu bortu apu a ligi beni e mellus a totu is nòminis!
Andendi a is cosas tènnicas chi su vìdiu s'amostat nci nd'at una importanti meda chi si biri luegus: su schema. Puru chi est una scarrafiada "a stili lìberu" su schema est precisu e, in custu acasu, no ddoi funt sbauladuras o pagu precisioni; certamenti sa tènnica chi Sputo at amanniau cun annus de allenadas agiudat a sa precisioni ma deu nau chi issa a sola no abastat. Chi si-ddu castiais torra su vìdiu eis a biri chi su scusòrgiu est un'àteru: su rìtimu! Sighendi beni a sa basi e pighendi beni su rìtimu cun is manus (apitzus de discu e crossfader) su schema s'alladiat beni, sena de singurtus e bellu "fluenti" e custu, po sa prusparti, cumbinat cun su stili e ddu caraterizat! Difatis in ingresu puru po nai chi unu tenit stili narant "he got flow". Chi tui scis fai totus is prus tènnicas difìcilis, chi ses lestru meda, ecc. ma no sighis a su rìtimu beni (chi no est a andai a tempus sceti!) no as a tenni mai su "fluidu". E Richard ddu tenit, balla chi ddu tenit! Sena nimancu unu crab, sena de chirps a lestresa dòpia o de flares a cincumilla clichis andat fluidu pighendi su rìtimu e donendi musicalidadi a sa scarrafiada, totu trancuillu cun su fader a s'imbressi e cun sa manu chi dònnia tanti pigat su discu in su sesu contra-oràriu (is caraterìsticas suas principalis), ligeru ligeru e cun stili meda. "Issu tenit su fluidu".
Bravu Richard e scusa-mì torra!
Lèssicu 1.4
(su) SCHEMA: s'andamentu chi donaus a is scarràfius; su fueddu italianu puru est "schema" ma est cussu ingresu chi fait cumprendi luegus de ita seus chistionendi, poita ca est cussu chi s'imperat sèmpiri: "pattern".
(su/is) SCARRÀFIU(S) LÌBERU(S): candu, apitzus de una basi musicali, si scarrafiat de manera improvisada. Eus a podi nai puru "freestyle".
(su) CLICHI: est candu cun su crossfaer, su fader de su canali, su cambiadori de su canali opuru s'alluidori specìficu studaus e allueus luegus su sonu. Pigau de s'ingresu "click" (chi est onomatopèuticu) e furriau a sa grafia nosta; ma sigomenti ca "clich" iat a podi essi lìgiu mali (CH a tipu "cherries" o "chili") deu nau de aciungi in sa scriidura sa I prostètica puru . Duncas "CK"="CHI" e naraus CLICHI(S).
(su) CAMBIADORI: est una spècia de alluidori chi podit tenni duas o prus positzionis e serbit po cambiai sa mitza sonora de unu canali àudio (po esempru de Phono a Line). In su passau, sigomenti ca is mixer fiant fatus po amisturai sa mùsica, po scarrafiai s'imperaràt s'alluidori faendi su clichi passendi de Phono (chi ndi arribàt su sonu de su discu) a Line (chi fiat sbuidu!). Arregordu cun praxeri chi su "clichi" faiat in so sonu puru, ca su passàgiu lestru e arripìtiu intra de Phono e Line fait una scarrighedda de "massa elètrica"! Custa costa si podit intendi beni in is discus Rap finsas a sa mitadi de is annus '90.
Su „scioru“
Eus scritu unas cantu bortas chi unu digei e, pruschetotu, cussu de batalla amostat s'abilidadi cosa sua in d-una filera de "routine" chi cundensat totu is tènnicas de scarràfiu e de giogulamentu chi scit fai, circhendi a ddas fai intendi e biri a su pùbriucu puru de manera spetaculari. In custu vìdiu nou-nou chi s'amigu nostu ingresu Dj Angelo at pubricau eriseru si podit cumprendi cun facilidadi manna comenti est cuncordau unu scioru de batalla, birendi a totu is diferentis partis chi ddu componint:
- Introdusidura (arritmu e fràsias de disfida in giogulamentu);
- Giogulamentu tènnicu;
- Scarràfius cun fràsias po introdusi (apitzus de strumentali);
- Scarràfius tènnicus cun sonus (apitzus de strumentali);
- Pàusa (break) po cambiai is discus unu a sa borta
- Giogulmentu arritmicu tènnicu e lestru meda a cantitadis vàrias (2/4/8);
- Routine a ciclu (loop) chi lompit a scarràfius tènnicus;
- Serrada cun fràsia a efetu ("Time is up! Later...").
S'efetu totali, chi su scioru est cuncordau beni, musicali, tènnicu e, mancai, spassiosu puru est de una cosa ùnica chi sonat comenti a una cantzoni e, chi su livellu at a essi sèmpiri artu in totus is partis, su pùbricu at a abarrai spantau. Chi seus in d-una batalla at a essi sa matessi cosa cun is giugis e is aversantis.
Pregontus: Dj Vajra (U.S.A. DMC Champion 2011)
E custa borta mi-nci scapat s'arrisu diaderus! Teneus s'onori mannu de pubricai unu pregontu fatu a unu digei "potenti meda", su campioni friscu-friscu de su DMC U.S.A. 2011 (chi si-dda at a batallai a sa finali mondiali in Londra in su mesi chi intrat), unu grandu digei de batalla chi tenit aìnturu sa scola bècia e dda portat in sa scola noa, scarrafiadori precisu, gioguladori fantasiosu e sceberadori de crassi de hip hop e funk: Chris "Dj Vajra" Karn de Denver (Colorado). Ita àteru de nai? Chi torru gràtzias meda a Verònica Atzei po s'agiudu cun s'ingresu! Imoi, perou, andaus a ligi su pregontu:
Saludi Chris e beni beniu in su blog de "Su Digei", su primu blog apitzus de chistionis tènnicas de digei (e no sceti!).
1 - SU DIGEI: Po mei ses unu de is mellus "digeis de batalla" de su mundu e m'arregordu chi Q-Bert iat nau chi ses unu de is suus "digeis de DMC" preferius. Ti bollu pregontai unu parrimentu personali meda: in su 2011 esistit ancora su digei de batalla in cumpetitzioni e creadori? Poita ca mi parit chi is tennologias noas ant creau làcanas creadoras fortis in su matessi tempus chi ant smenguau is làcanas tènnicas.
R - DJ VAJRA: Deu pensu chena de dudas chi su digei creadori e in cumpetitzioni bivit ancora. Faendi umperai is tennologias noas in is batallas si funt donadas a is digeis unu sciacumannu de maneras de nci sonai comenti mai iant tentu ananti. Su DVS at cambiau su giogu a su mellus.
2 - SU DIGEI: Abarraus apitzus de is chistionis tènnicas (chi nosi praxint aici meda!): tui umperas a Serato, cun su TTM-57 sèmpiri prontu a s'azioni. Cali est su prus bantaxu mannu chi as tentu de-i custu sistema e cali su prus sbantaxu mannu?
R- DJ VAJRA: Sa mellus cosa umperendi a su Serato impari a su 57 est chi tenis a totu is controllus in su mixer. Sa cosa lègia est chi no ddoi funt teclas bastantementi e depis cambiai de truma in truma po funtzionis diferentis.
3- SU DIGEI: Su frunimentu cosa tua is cuncordau de manera diferenti candu sonas cun trumas "hip hop"?
R - DJ VAJRA: Seu sonendi dònnia tanti cun d-una banda de Denver chi ddi narant "Big Wheel", e candu nci sonu impari umperu a unu pratu, solitamenti. Candu tenis unu sonadori de arratantina forti meda, su giogulamentu sonat comenti a una cosa no professionali.
4 - SU DIGEI: Chistionendi di hip hop: est una genia de mùsica chi ses liau meda ma ddu ses a sa matessi manera a su funky. Est berus? Candu depis fai una scalita chi ponit impari a s'hip hop e a su funky su sceberu de sa filera de is cantzonis est liada prus a sa lestresa o is sonus insoru?
R - DJ VAJRA: Mi praxint medas genias de mùsica, hip hop e funky incluius. Sa lestresa contat in su sceberu de is cantzonis de amisturai, ma tocat a nci traballai apitzus de is sonus puru. Fatzu unu sciacumannu de proas e de faddinas candu ddus pongu aparis. S'arresultau a s'acabu depit sonai beni in totu su chi fatzu.
5 - SU DIGEI: Apu fatu unu pregontu a Dj Angelo (grandu digei ingresu) e issu at nau una cosa chi mi praxit: "No mi potzu arriscai de biri a genti arròscia in s'interis chi seu faendi unus milli gioghitus, est mellu a tenni unu spetàculu cun su 75% de mùsica e su 25% de scioru". Ses diacòrdiu? Tenis su matessi acostamentu?
R - DJ VAJRA: Dipendit de sa genti, podit essi de prus o de amancu, perou eja, seu deacòrdiu.
6 - SU DIGEI: Ita nosi naras de is primus seti mesis de su 2011 cosa tua de s'ala professionali? As fatu medas cuncertus?
R - DJ VAJRA: Ocannu mi seu cuncentrau meda apitzus de is batallas, ma apu fatu calancunu cuncertu togu puru. Custu est stètiu siguramenti su mellus annu de sa carrera mia de digei, e speru de sighiri a otenni de prus.
7 - SU DIGEI: Torraus a is batallas: su DMC Online Dj Battle parit una grandu cumpetitzioni e su fatu chi as participau tui puru mi torrat una cunfirma de traessu. Cali est s'impressioni tua generali? Calincunu de timi?
R - DJ VAJRA: No seu siguru a su 100% chi apu a sighiri ancora in sa batalla in s'arretza, poita ca apu bintu is finalis DMC USA e seu giai prontu po andai a-i cussas mondialis. Is àterus batalladoris funt totus bonus meda, ma deu no timu a nemus.
8 - SU DIGEI: Calincuna inditadura po is giòvunus chi nosi ligint?
R - DJ VAJRA: Traballu tostau, passioni e costàntzia a s'acabu ant a pagai.
9 - SU DIGEI: Ses bènniu mai in Sardìnnia? Ita ndi pentzas de s'ìsula nosta?
R - DJ VAJRA: No seu stètiu mai in Sardìnnia ma m'iat a praxi MEDA a nci andai una dii. Seu sìguru chi innia est bellu meda!
10 - SU DIGEI: S'annu chi benit is Denver Nuggets ant a agafai is playoffs?
R - DJ VAJRA: No creu chi is Nuggets ant a fai is playoff s'annu chi benit. Trupu trumas fortis in su West, e is Nuggets no tentint "star" intra de is giogadoris. No podis binci chena de unu "go-to" giogadori a s'atacu.
SU DIGEI: Gràtzias meda po sa gentilesa e sa passièntzia. Speraus de ti biri luegus in Europa!
DJ VAJRA: Gràtzias!!
Versioni ingresa de su pregontu.
Unkut (GER) bincit sa primu „DMC Online DJ Championships“
E nci-dda at fata: Dj Unkut (GER) at bintu sa primu batalla in s'arretza cuncordada de sa DMC e duncas at a depi a si-dda gherrai a sa batalla "normali" in Londra su 6 e su 7 de su mesi de Ladàmini. Apalas de su tedescu funt arribaus: Ritchie Ruftone (UK), Fong Fong (FRA); su de cuàturu est s'italianu Dj Cordella (segundu in sa classìfica personali de Dj Kentaro, chi calincuna cosa gei dda cumprendit!).
Deu nau chi est stètia una batalla bella meda, unu sperimentu sèriu fatu de chini at sèmpiri organitzau is batallas de digei, aberrendi is portas a totu su mundu cun s'arretza e donendi vida noa a is sciorus cun s'umperu de totu is tennologias noas chi ddoi funt oindii (DVS, controlladoris, ecc.). Is bisuras de totu is vìdios funt stètias prus de unu millioni e, duncas, sa cosa (agiumai fata chena de dinai!) at funtzionau beni meda. No est una "manera" chi at a ndi pigai su logu a is batallas "normalis" ma seu siguru chi est sa manera de fai amanniai s'interessu apitzus de is digeis connotus ma, pruschetotu, nous, chi ant a podi amostai bidea, tènnicas e musicalidadi a totu su mundu arregistrendi unu scioru in s'aposentu insoru! Duncas o piciocus: preparai-sì po su DMC Online prossimu! Deu mi passu, ca seu bèciu e scarsu!
Innoi agatais sa noa, totu is arresultaus generalis e cussus de is giugis: http://www.dmcdjonline.com/
Avotai genti, avotai!
Chi si fait praxeri podeis avotai a Dj Cordella chi est intra de is 22 digeis chi funt lòmpius a-i custa torrada. Su 30 de Austu is 10 digeis chi ant a airi arriciu prus avotus ant a si-dda gherrai in d-una batalla manna finali, chi ndi at a bogai su primu "DMC Online DJ Champion 2011". Su Digei narat de avotai a Dj Cordella, ca ddi iat fatu unu pregontu de pagu e nosi pensaus chi si-ddu merescit custu avotixeddu! Ajò, amollai-si-nci!
Custu est su bivimentu po avotai.
Batallas in sa retza de DMC – sa de cuàturu noas
In s'interis chi femus faendi pregontus aforas de sa Sardìnnia e chistionendi de cosas tènnicas meda, sa batalla "DMC Online Dj Championships" fiat sighendi su tretu suu e, duncas, andaus a castiai unu pogheddu aundi est lòmpia e cali est sa situatzioni: a sa de dexi torrada est "Dj Fong Fong (Frantza)" chi bincit, cun d-unu scioru stravanau! Castiai-si-ddu circhendi a no arriri tropu e a si gosai sa fantasia, sa precisioni e sa tènnica de-i custu macu:
Passat a sa torrada afatanti "Dj Snayk Eyez (USA)", dj underground de batalla chi no s'intendiat de diora (fiat connotu meda unus dexi annus a oi), chi at amostau stili de scola bècia amesturau a tènnicas noas cun s'acostamentu cràssicu de is digeis americanus chi funt "nàscius" in is annus '90 aìnturu de su mundu de s'hip hop, candu is batallas fiant liadas meda a-i cussa cultura:
Sa giuria, comenti a su sòlitu, fiat de ddi portai arrespetu mannu:
DJ CO-MA (Giaponi)- DMC Battle For World Supremacy Champion 2006
Pro Zeiko (Germània) - DMC Battle For World Supremacy Champion 2005
Cutmaster Swift (Arrènniu Uniu) - DMC World Champion 1989
Dj Sputo e s’umperu de sa tènnica „a s’imbressi“
Est arribada sa basca lègia e, puru chi si costat una bella sudada (ca sa computera est a tipu forru allutu), torraus a sciri in su blog, ca seus firmus de unu mesi!
Funt acontèssias unas cantu cosas (DMC Italy, tanti po nai, cun d-una participatzioni manna de digeis de sa Sardìnnia), e nd'eus a chistionai luegus de manera tènnica, comenti eus sèmpiri fatu finsas a imoi, e àteras "internatzionalis" funt buddendi in sa pingiada!
E duncas: DMC Italy est a nai batalla de digei. Dj Sputo est stètiu unu de sa truma de is sardus chi ddoi fiant in Milano a si-dda gherrai po su "Killa Combat Scratch". Chena de intrai in su detàlliu de sa batalla (po imoi) si-ddu bollu presentai unu pogheddu a custu digei, giòvunu e bravu meda, e ddu fatzu cumbidendi-sì a si castiai custu vìdiu:
Comenti eis biu est unu "freestyle de scratch" chi amostat sa tènnica de Sputo chi, po mimi, est s'ùnicu "digei de batalla" traditzionali chi teneus imoi in Sardìnnia, poita ca Dj Nike, su primu chi iat fatu e bintu batallas (campioni de su DMC Italy 1997), no batallat prus e Richard (su nòmini suu) at inghitzau de diora e est unu chi sighit a fai is sciorus suus ponendi-nci scarràfius, assortamentus e giogulamentus de manera siat cràssica chi noa. Un'àtera caraterìstica de Sputo (ma no sceti de issu, craramenti!) est s'umperu de su crossfader "a s'imbressi", est a nai cun su canali de a manca chi serrat a manca impasi chi a dereta (e su de a dereta a dereta, impasi chi a manca). S'arregordu chi su crossfader si permit de passai de unu canali a s'àteru movendi unu curreu sceti e no duus (cussus funt is curreus dedicaus, unu po dònnia canali postus a prumu in su mixer). Est una manera chi umperant su 50% de is digeis, imoi chi su mixer portat sèmpiri sa tecla po ndi cambiai sa diretzioni a su crossfader e no tocat a ponni a s'imbressi is gavetus de is pratus (comenti si fait in is annus '80 e '90) e su maistu de custa modalidadi est Dj Q-Bert.
Su bantaxu scarrafiendi iat a podi essi de aberri su crossfader cun su pòddixi e de ddu serrai cun is àterus didus, ma deu nau chi est una chistioni de tastu, opuru de comenti ti-ddu bis in conca su movimentu (a mimi su crossfader a s'imbressi mi fait pensai comenti chi sia scarrafiendi umperendi su fader de su canali). E comuncas ddoi funt digei che a Dj Tigerstyle chi umperant su crossfader siat normali chi a s'imbressi, arrennescendi a fai medas tènnicas. Una cosa chi agiumai sceti Dj Sputo fait est de cambiai dònnia tanti sa positzioni de sa manu apitzus de su discu; chi si castiais torra su vìdeu eis a biri chi sa manu si movit de sa parti de a manca de su discu a-i cussa de dereta, acanta de su bratzu de su pratu, pruschetotu candu depit fai unu "Orbit Flare" (tènnica chi segat su sonu in tres partis a s'andada e a sa torrada, faendi unu sonu simbillanti a una cosa chi pendit). Richard est unu maistu de custa tènnica chi est difìcili meda siat po su nùmuru de atzas chi si depint fai in pagu tempus, siat poita ca aguantendi su discu a s'imbressi arriscaus de donai unu corpu cun sa manu a sa puntina. In d-unu de is posts benidoris eus a biri e a circai de spricai sa matessi cosa faendi-dda cun sa manu dereta e cantu est bantaxosu a essi scarrafiadoris de manu dereta. Richard difatis (comenti a mimi e àterus) scarrafiat cun sa manu manca, umperendi sa manu forti (sa dereta) apitzus de su crossfader...ma a bortas sa manu forti est sa manu manca! Est una chistioni trumbullosa! Est craru chi, a sa fini: chi ses forti...ses forti!
Lèssicu 1.2
A S'IMBRESSI: candu cambiaus sa diretzioni de is canalis de su crossfader opuru sa parti de su fader chi aberrit e segat su sonu. In italianu est "invertito" opuru "al contrario", in ingresu ddi nàrant "hamster" opuru "reverse" (comenti est scritu sèmpiri in sa tecla de su mixer).
(su) FREESTYLE: candu, apitzus de una basi musicali, si scarrafiat de manera improvisada. Eus a podi nai puru "scarràfius lìberus".
(su) GIOGULAMENTU: fueddu nou chi apu sceberau de "giogulanu" (in italianu: "prestigiatore"). Est sa tènnica chi s'umperat po fai arritmus e melodias cun totu e duus is pratus e duus discus agualis o diferentis. In ingresu, difatis, ddi nàrant "beat juggling".
Batallas in sa retza de DMC – sa de tres noas
Sa batalla "DMC Online DJ Championships", chi seus sighendi de custu blog, est lompendi a essi interessanti meda, o piciocus! Un'àtera sentèntzia cun spantu: "Ritchie Ruftone (UK)" est su bincidori e "Dj Cordella (ITA)", italianu pulliesu de Taviano (LE), passat a sa torrada afatanti comenti a su mellus apalas de su primu!. M'eis a nai: "e poita totu custu infogu?". Pruschetotu poita ca Cordella est grandu sperimentadori e presentadori de ainas de digei (Alarmusic, Numark, ecc.) e puru poita ca tenit cussu "tocu" de scola bècia in is sciorus cosa sua chi mi fait praxeri meda a intendi. Balla, custa borta puru sa giuria fiat cosa de timi:
DJ Shiftee (USA) - DMC World Champion 2009 / DMC Battle for Supremacy Champion 2007
DJ Yasa (Japan) - 4 x DMC World Team Champions
DJ Dopey (Canada) - DMC World Champion 2003
Lèssicu 1.0
(sa) PRESENTADA: candu unu digei spertu provat un'aina e ndi scriri ita ndi pentzat, chi siat po unu blog tènnicu, unu giorronali de su setori professionali, ecc.. In su mundu de su digei is presentadas e is vìdeo-presentadas funt importantis meda poita ca medas bortas si tocat a comporai un'aina in s'arretza, chena de dda podi provai.
Batallas in sa retza de DMC – sa segundu noa
A s'acabu de sa segundu torrada nci funt bessius duus digeis chi ant a si-dda gherrai in sa finali de Austu de sa batalla "DMC Online DJ Championships": "Dj Rasp (UK)", chi est su bincidori, e "Loop Skywalker the turntable Jedi (UK)", chi passat a sa torrada afatanti comenti a su mellus apalas de su primu (britànnicu issu puru). Is sciorus de custus duus piciocus no m'ant fatu sartiai de sa cadira perou chi custa giuria at ditzidiu aici mi tocat a mi citiri:
DJ Noize - 1996 DMC World Champion
DJ Kentaro - 2002 DMC World Champion
DJ Pfel (C2C) - 4 x DMC World Team Champion
Lèssicu 0.9
(sa) GIURIA: in dònnia batalla de digeis sa giuria avotat is sciorus e pigat is detzididuras. Chi sa batalla est internatzionali-ofitziali is arrègulas ant a essi is matessis in dònnia logu (po es.: su DMC in Tailàndia at a essi fatu comenti a su DMC de su Canada).
Batallas in sa retza de DMC – sa primu noa
Duncas: sa batalla "DMC Online DJ Championships" est inghitzada e sa primu torrada tenit giai is bincidoris, chi ant a essi arrenomenaus giòbia su 17 de custu mesi. Sa curiosidadi est manna poita ca, comenti nàrat sa noa ofitziali de su DMC, no scireus ita at a fai chini nci at a bessiri: si-dda ant a gherrai cun su matessi video? Ant a arregistrai duus minutus nous? Opuru calincunu at a lassai perdi? Deu apu castiau totu is video (gana meda ndi tenemu, berus?) e avotau chena de generosidadi e, a nai sa beridadi, s'ùnicu chi at fatu duus minutus de fogu est stètiu Dj Unkut (Germània), chi cun d-unu scioru de lestresa, precisioni e tènnica apitzus de is sonus cuncordaus de Le Jad (produsidori famau meda po is basis potentis, siat po is batallas chi po nci arrepai asuba) s'est guadangiau is cincu steddus cosa mia. Castiai-si-ddu:
Tanti po essi precisu, si fatzu apubai ca est imperendi su mixer nou de sa Vestax, su PMC 05 pro IV (gei ddu eus a biri prus ananti) e Traktor Scratch Pro impari a su controlladori Maschine (totu e duus de sa Native Instruments); no creu chi ddu fetzat po debadas ca Vestax, Zoo York e àteras firmas puru ddi faint de amparadoris (castiai is apositzus in su sprigu!).
Po torrai a sa chistioni de su post e dda serrai cun lestresa: sa DMC si fait sciri chi at tentu 50.000 vìsitas in duas cidas e chi at avotau genti de: U.S.A., UK, Germània, Corea de su Mesudii e natzionis chi no ant participau mai a su DMC, che Colòmbia e Cile, chi si-dda funt gherrada beni puru!
Insaras, abetaus a su 17 de Martzu e bireus chini at a passai a su segundu turnu. Nosu bos'eus a donai noas dònnia borta, cun sa speràntzia chi siat una batalla sèmpiri prus potenti e prena de novidadis tènnicas e musicalis.
Lèssicu 0.7
(su) SCIORU: is batallas de digei funt, pruschetotu, una filera de "routine"; sa tradusidura precisa iat a depi essi "andatzu" ma si sciri ca a custu fueddu ddu imperaus in àterus tèssius. Duncas "scioru" podit essi una solutzioni.
(su) AMPARADORI: est su chi ddi nàrant "SPONSOR", chi ndi benit de su latinu "sponsor"=fiantzeri (verbu "spondere"=promiti cun solennidadi). Eus a podi nai "su sponsor" puru ma chi nci-dda faeus a sceberai unu fueddu sardu est mellus.
Posts Nous
- Pioneer PLX-500: prètziu bàsciu e calidadi
- S’umperu de is ainas: mixer, pratu, DVS, controlladori e sintetizadori
- Reloop Neon, su controlladori nou de Reloop
- Vestax e Ecler serrant: s’acabu de un’era
- DMC World Final 2014: is arresultaus
Cumentus nous
- bei Dj Sputo e s’umperu de sa tènnica „a s’imbressi“
- bei Dj Sputo e s’umperu de sa tènnica „a s’imbressi“
Genias
- Ainas
- Batallas
- Comunicatzionis
- Incraramentus
- Novas
- Pregontus
- Presentadas
- Programas
- Tènnicas
- Uncategorized
- Vìdius
Amigus
- A.Ca.Li.Sa
- Acadèmia de su Sardu
- Amos Cardia
- Barbara Picci
- Canis Sardus Antigus
- Comitau.org
- Ditzionàriu.org
- Dj Angelo [UK]
- Dr. Drer & Crc Posse
- Electroneddas
- ilDeposito.org
- Ivo Murgia
- Lollove
- Sardìnnia Stravanada
- Stèvini …su chercu
- Vito Biolchini