SU DIGEI
5Mrz/140

Su 2014 DMC Online DJ Championship

Ocannu puru si fait su 2014 DMC Online Dj Championship, forsis sa prus batalla manna de digeis in s'arretza. Is digeis de totu su mundu ant a podi participai intreghendi unu scioru insoru de duus minutus bia Youtube, est a nai sa democratzia sintzilla! Sa giuria? Totu is chi ant ddus castiai ant a podi votai de su giassu de su DMC (unu votu sceti po dònnia digei chi s'at a praxi). Imoi seus a su primu giru; a s'acabu de totu su tretu su bincidori at a tenni s'onori de si-dda podi gherrai cun totu is bincidoris de is DMC natzionalis a sa batalla finali mondiali chi s'at a fai in s'atòngiu. Nosu siguramenti no eus a participai ca si praxit a scriri e a biri vìdius  ma no a fai sbianchimentu! In Sardìnnia gei nci-nd'at de digeis giòvunus e bravus... spereus chi si-dda tentint e chi amostint, cun is tènnicas de scarràfiu e de giogulamentu insoru, chi innoi puru nci at genti bona meda.

12Sep/130

Jon1st (UK) bincit sa de tres „DMC Online DJ Championships“

Ocannu puru sa DMC at fatu sa batalla in s'arretza e donau visibilidadi a unu sciacumannu de digeis de dònnia parti de su mundu (Brasili, Cile, ecc.) ma, a s'acabu, s'Europa nd'at bogau su campioni nou. In su 2012 fiat stètiu su franzesu Fong Fong a binci ma ocannu sa Franza pìgat su de noi postus sceti cun Dj Groove Sparkz (stilosu meda cun is scarràfius e pretzisu meda ma su scioru cosa sua, a s'acabu, est stètiu unu pogheddu "bambu" e chena de naturali); s'Arrènniu Uniu, invecis,  bìncit cun Jon1st (scioru lìmpiu, unas cantu tènnicas friscas, scioberu musicali modernu-eletrònicu ma de cussus chi no ti-nd'arroscis apustis de binti segundus!) e pìgat su de tres (Ritchie Ruftone) e su de seti (Dj Rasp) postus puru. A su segundu postu agataus s'amigu canadesu Dj Vekked (chi ddi eus fatu unu pregontu in su mesi de Gennàrgiu), campioni 2012 IDA Technical e DMC Supremacy. Innoi is classìficas finalis cun is avotus de is giugis e de su pùblicu (Jon1st at bintu totu e duas, craramenti) e bosi cumbidu a ddas acarai e a fai unus cantu de arrexonamentus:

http://dmcdjonline.com/video.php?t=results

Imoi a Dj Jon1st ddi tòcat a batallai a sa finali mondiali DMC su 5 de su mesi de ladàmini a s'Indig02 de Londra!

31Jan/130

Pregontus: Dj Vekked (IDA 2012 Technical e DMC 2012 Supremacy champion)

Piciocus, no si perdeus in girus de fueddus longus! Unas cantu cidas a oi eus fatu unu bellu pregontu a Jake "Dj Vekked", unu digei chi in su 2012 at bintu de totu e de prus (IDA, DMC Supremacy...); est stètiu simpàticu e disponìbili meda e ddi torraus gràtzias sperendi chi, in su 2013 puru, at a binci batallas e at a nosi arregalai unu montoni de scarràfius, sciorus e mùsica de gosai. Insa', labai su pregontu:

1 – SU DIGEI: Diferèntzias intra de DMC e IDA: tènnicas, giugis, arrègulas, etc.. Cali est sa mellus batalla?

R – VEKKED: Po s'IDA tenis abisòngiu de prus materiali, e su formau est prus difìtzili. Sa bogadura est sa prus parti “tostada” de sa batalla e su formau: de 13 personis 4 ndi àndant a sa mesu-finali. In prus, a dònnia torrada, depis scarrafiai/fai giogulamentus e no podis passai chena de unu de custus. Sa cumpetitzioni a 6 minùtus de su DMC est prus difìtzili ma s'IDA est unu pogheddu prus forti de su DMC Supremacy e prus dèbili de su DMC 6 minùtus. Mi praxit unu pogheddu de prus s'acontèssiu e s'impostatzioni de s'IDA, est stètiu stravanau ca su team de s'IDA fait funtzionai totu lisu... no ddoi at cansàntziu po apariciai totu. Su parri miu est chi imoi su DMC siat sa prus batalla difìtzili poita ca est sa prus antiga e atinat prus natzionis ma s'IDA tenit unu benidori luxenti diaderus, deu incoru a dònnia digei a circai de nci intrai. S'IDA est stètia sa mellus sperièntzia mia de digei chena de dudas.

2 – SU DIGEI: Digeis canadesus: A-Trak, Dopey, Lil' Jazz... cali de issus t'at donau ispiratzioni?

R – VEKKED: Mah, càstia... medas. Seu stètiu ispirau meda de is digeis canadesus. Nci-ndi funt medas bravus diaderus, e unu tanti de issus no est connotu meda. Po sa prusparti seu stètiu ispirau de: Turnstylez (D-Scratch, Lil' Jaz, DJ Grouch), DJ Brace, Wundrkut, Shub, A-Trak, Jr. Flo, M-Rock, Jooce, Pump, Drastik, Kid Koala, DJ Mana. Totu custus piciocus funt bravus diaderus e medas de issus funt sutapretziaus... medas digei canadesus no tenint sa matessi pubricidadi de-i cussus americanus.

3 – SU DIGEI: Chistionendi de tennologia, apu biu chi umperas Serato cun su RANE 62. Ita ndi pensas de custu micser? E cali arrecumandas che a scèberu? Giai ddu scis chi su 62 costat meda!

R – VEKKED: Imoi su 62 est su micser chi prefèrgiu. Mi praxit a tenni Serato/DVS integrau aìnturu de su micser impari a is controllus. Nomi praxit a tocai my tragaditzu in su mentris de su cuncertu chi no depu. Duncas, po custa tenta, is Rane 62 e 57 mius funt is chi m'agradant. Su Z2 e su Vestax Pro IV parrint togus comenti a ainas “no Rane”. Po su chi pertocat is micsers chena de DVS prefèrgiu su Vestax 08 cun Innofaders po scarrafiai.

4 – SU DIGEI: Pròssimu tentas: batallas, discus, produsiduras, cuncertus, pàsiu...

R – VEKKED: Bollu a batallai ancoras, no m'intendu giai “spaciau”. Forsis seu lòmpiu a su 75% de su potentziali cosa mia. Pensu chi, in is duus annus benidoris, apu a ndi benni a essi prus forti. Mancai apa tentu un'annu bonu diaderus ocannu, no tengu sperièntzia meda. Forsis apu fatu 7 o 8 batallas sèrias in sa vida mia, duncas seu ancoras imparendi meda apitzu de comenti ddas fai. Bollu fai mùsica puru chi tengu unu pagu de tempus lìberu, cun preferèntzia po sa mùsica fundada apitzu de su scratch.

5 – SU DIGEI: Ita mùsica ponis in is currillus? Deu pensu chi tui siast unu digei giòvunu chi tenit una connoscièntzia manna de sa mùsica, printzipalmenti de cussa de is annus 90... Seu sballiendi?

R – VEKKED: Mi praxit sa mùsica fata apitzu de is campionamentus cun arratantinas grais, duncas apu sèmpiri scioberau hip-hop de scola bècia e breaks. A nai sa beridadi no sonu in is currillus ca in Cànada no nci-ndi funt medas po nci sonai sa genia de mùsica chi mi praxit, e no min-nd'importat de sonai mùsica “pop”.

6 – SU DIGEI: Tèssiu de digei europeu contras a su tèssiu de digei americanu: su parrimentu tuu.

R – VEKKED: Po is batallas is digeis europeus funt prus eletrònicus e orientaus apitzus de su scarrafiau, is digeis americanus umperant meda prus mùsica de su connotu e s'orientant de prus apitzu de su giogulamentu. Pensu chi is digeis europeus, imoi siant, in totu, prus ainnantis, ma calincunu, ma medas sighint sa moda de manera tropu acostada. Medas funt bonus scarrafiendi, ma est fàcili a biri is influèntzias insoru. Podis nai custu apitzu de totu is digeis, ma deu pensu chi siat poita s'Euròpa at tentu medas grandu campionis in custus annus (Netik, Rafik, Unkut, Fly, etc.) e medas digeis funt sighendi is arrastus insoru. Is digeis americanus, imoi de pagu, pensu chi apant unu stili prus ùnicu, ma scarrafiendi no siant aici tènnicus o lìmpius po sa prusparti. Est agiumai una chistioni de “tènnicas contras stili”. Creu chi, de su 2005-2010 est stètiu a s'imbressi, is digeis europeus teniant unu stili prus ùnicu/arrefinau e is digeis americanus fiant sighendi una surra de modas (I-Emerge apitzu prima de totu). Sa cosa andat a fàsias. Deu speru chi nci at a essi unu tempus chi ambaduus lompant a su prus cùcuru artu insoru comenti a is diis de is Skratch Perverts contras a The Allies.

7 – SU DIGEI: Tui ses canadesu e duncas, siguramenti, ses “a duas lìnguas”: is fueddus tènnicus funt mellus espressaus in ingresu o in frantzesu? Ddoi funt curiosidadis chi ndi bessint a pillu acarendi is duas lìnguas?

R – VEKKED: Ha ha ha! Crei-nci o no ma su frantzesu miu no est bonu. Ddu apu studiau in sa scola e ddu portzu ligi bastanti po fueddai in frantzesu in is “French DJ Message Boards” e ligi calincunu giassu, ma casi sèmpiri is frantzesus fueddant un'ingresu prus bonu de su frantzesu chi fueddu deu! Ha ha ha!

8 – SU DIGEI: Tui scarràfias e fais giogulamentus a s'imbressi: poita custu scioberu? Su crossfader a s'imbressi est unu profetu, de manera speciali po-i cussus chi umperant sa manu dereta, che a Q-Bert?

R – VEKKED: Apu inghitzau a scarrafiai a s'imbressi po sa matessi arrexoni de meda genti: su micser cosa mia teniat curreus lòfius e femu imparendi cun is cambiadoris de lìnia. Candu apu incarrerau a imparai giogulamentus e amisturamentus apu apoderau su crossfader a cussa manera e, duncas, podendi sighiri a scarrafiai in su mentris chi faemu dònnia cosa... simplementi teniat unu sentidu, po mei! A lestru, emu cambiau is curreus de is canalis (su pratu a manu manca acapiau a su canali de a manu dereta e s’àteru a s’imbressi [n.d.s.]) poita ca mi parriat prus fàcili a passai de su crossfader a s'imbressi a su canali cambiau. No creu chi nci siat profetu mannu, pruschetotu scarrafiendi, normali o a s’imbressi est sa pròpiu cosa. Po is giogulamentus nci funt una pariga de tènnicas chi funt prus fàcilis cun su fader a s’imbressi e, po contras, àteras prus fàcilis cun su fader deretu. Su fader est prus lestru deretu po is giogulamentus ma est prus fàcili a fai movimentus lestrus de su discu candu est a s’imbressi, ma funt acanta meda.

9 – SU DIGEI: Connoscis sa Sardinia?

R – VEKKED: Haha, nou! Est bella? Emu a depi a dda abisitai? Agatai-mì unu cuncertu!

10 – SU DIGEI: Comenti a is mellus pregontus serraus cun: bonu annu nou!

R – VEKKED: Gràtzias medas!

Vekked ande Facebook

Versioni ingresa de su pregontu

11Dez/120

IDA 2012, is arresultaus: VEKKED bincit torra!

Cida passada, in Cracovia (Polònia), s'IDA (International Dj Association) at fatu sa finali mondiali cosa sua, sa prus batalla stilosa de ocannu. Is arresultaus, friscus friscus, s'oberrint cun d-unu spantu:

VEKKED (Cànada) est su campioni nou de sa categoria TECHNICAL!

Sighint TOPIC (Frància), ODILON (Bèlgiu) e RITCHIE RUFTONE (Arrènniu Uniu).

E poita totu custu spanti? Tziu Vekked iat bintu giai sa finali DMC SUPREMACY 2012 e, in d-unu artìculu  chi emus scritu in su mesi de Cabudanni apitzu de su DMC online, emus nau giai de ddu aguantai a bisura a custu piciocu, ca teniat musicalidadi e stili meda in sciorus cosa sua... e difatis nd'est bessiu campioni duas bortas in is prus batallas mannas de su mundu. Eus ndi a scriri un'articuleddu dedicau, comuncas.

Po s'àtera categoria chi ddi narant SHOW, is trumas funt:

STEVE NASH & FUNKTION (Polònia) bincidoris, sighius de BEAT BOMBERS (Portogallu) e SKILLZ MACHINE (Bèlgiu).

Bosi fatzu apubai lestramenti chi, intra de "technical" e "show", su Bèlgiu ndi pigat unu segundu e unu de tres postu e su Portogallu fait spantu cun su segundu postu in su show (duncas no funt bravus scéti a giogai a palloni!). Sa Polònia, meri de domu, pigat s'òru in su "show". A bosàterus a giudicai chi sa giuria dda at intzertada!

 

3Okt/120

Dj Izoh… ma diaderus?

Custu est su vìdiu de su scioru de 6 minutus bincidori de su DMC 2012: su giaponesu Dj Izoh est su campioni nou. Andendi prus atesu de sa noa sa pregunta chi mi deu postu luegus est stètia: ma diaderus? Tocat a nai sa beridadi: custu scioru est unu pogheddu ghetau apari, unu muntoni de sonus scuartaraus e de tènnicas bellas, certamenti, ma imperadas cun sbauladuras medas e custa cosa est strana ca scireus comenti funt pibincus is giaponesus (sa precisioni de Kentaro, Akakabe, Co-ma, ecc. est connota). Ita aciungi? Chi no eus biu is àterus sciorus po nai chi Izoh si-ddu est minèsciu custu tìtulu perou, chi mi pensu a Dj Precision apalas de Izoh, calincuna duda manna mi benit a conca. Sa chistioni, po mei, est chi, de candu su frantzesu Dj Fly at bintu su tìtulu in su 2008 at sinnau s'arruga noa de su DMC, cun d-unu scioru potenti e tènnicu a is prus livellus artus e, apustis, est stètiu dìficili meda a torrai agoa (ma giai Netik e Rafik, in su 2006 e 2007, iant comentzau a fai custa "rivolutzioni") e prus difìcili a ddi passai ananti. Su 2008  est stètiu s'inghitzu de s'epoca "moderna" de su DMC ma sa smèngua est stètia lestra meda... Chi iat participau torra, Dj Fly nd'iat bintu àterus 4 de tìtulus! Deu nau chi su DMC cust' 'orta at fatu unu pogheddu de sbianchimentu ca custu de Izoh no est unu scioru dìnniu de unu "campioni mondiali" e chini comenti a mei sighit is batallas de sèmpiri bai siguru chi dda pensat aici. Eis a biri chi de s'annu chi 'enit ant a torrai sciorus "a s'antiga" po sa musicalidadi impari a tènnicas sèmpiri prus lìmpias e arrefinadas.

Unus cantu cunsiderus comenti a sa sòlita: in s'epoca de su DVS, chi est bintrau de manera ofitziali in is batalla giai de diora, Izoh imperat Serato ma chena de mixer stravanaus! Scatuledda SL-3 (mi parrit) acapiada a unu mixer chi at a tenni assumancu 14 annus: su Technics SH-DJ1200, est a nai SU mixer de batalla ("The official world Dj Championship mixer"), mixer ofitziali de su DMC de su 1997 finsas a unus cantu annus a oi (e depiast imperai CUSSU!). Nci est pagu de fai: is giaponesus funt natzionalistus meda po is ainas de digei (Technics, Vestax, Pioneer, ecc.) e Izoh bincit su prèmiu assumancu po su scioberu de su mixer... e de is gavus! Difatis totu cussus gavetus coloraus e stravanaus a setzioni prana s'agatant in Giaponi sceti!

Abetaus àterus vìdeus, de sa World Supremacy puru, mancai, po cumprendi chi totu su chi eus scritu est unu scimpròriu o chi eus fatu s'arrexonamentu giustu.

20Sep/120

DJ Unkut cun su Vestax VCI-400

Eus scritu giai apitzus de-i custa impunna de is grandu firmas a nci ponni in su mercau de is ainas po digei controlladoris MIDI e consolle sèmpiri prus pibincosas e, craramenti, comenti est pretzisu in custu tretu modernu de marketing bia internet, bireus sciorus stravanaus fatus de digei potentis (sa Reloop cun Dj Angelo, po nai). Eriseru sa firma giaponesa Vestax at pubrucau unu scioru stravanau de Dj Unkut, campioni DMC tedescu (ma turcu de sangunau!) imperendi su controlladori MIDI nou VCI-400. Totu bellu, potenti, lestru, lìmpiu e tènnicu comenti si spetat a una bella... pubricidadi! Su parrimentu miu est chi custas ainas funt bellixeddas meda ca tenint unu muntoni de funtzionis e funt tragaditzas perou, chi seus chistionendi de "digei", ddas depeus biri comenti a scèberus a is pratus. Controlladoris MIDI po is efetus e totu is àteras cosas nci-nd'at àterus prus baratus! S'apoddu innoi asuta su chi emu scritu in su mesi de Donniassantu de su 2011 e chi sigu a pensai:

"... funt circhendi a fai issus su mercau, sciendi chi is ligidoris CD ant a bendi sèmpiri de a mancu ca su CD est morendi-sì comenti a formau lassendi totu su logu a is formaus digitalis (.mp3, .ogg, .vor, .wav, .aif) e duncas a is consolles USB e a is DVS cuntrullaus cun is pratus puru. Insaras funt circhendi a proponni una spècia de consolle analògica/digitali cun is pratus e un'aina ùnica po mixer e controlladoris, in prus chi unu computer chi at a serbiri amarolla."

4Sep/120

Fong Fong (FRA) bincit sa segundu “DMC Online DJ Championships“

Sa segundu batalla manna in s'arretza "DMC Online Dj Championships" est spaciada e s'at nau chini est su bincidori de su 2012: Fong Fong (FRA), chi s'annu passau iat pigau su de tres postus. Bellu scioru lestru, lìmpiu e tènnicu de custu piciocu bravu e pibirudu, chi ddi praxit a si trassai (òmini lupu, Scream, Homer Simpson, ecc.) e a fai "su scimpru" in is vìdius cosa sua, in s'interis chi est scarrafiendi cun seriedadi pròpia de su campioni... e nci est lòmpiu a ddu essi! Imoi si-dda at a depi gherrai in sa finali de su DMC "normali", eus a nai, in su mesi de Ladàmini in Londra.

De batallas in s'arretza ndi eus chistionau giai meda e, comenti emu nau, funt amanniendi-sì e is digeis potentis si-nci funt amollendi, ca donant visibilidadi, faint lompi a is batallas che a su DMC e si bincint prèmius puru (dinai, ainas, ecc.). Apitzus de custa chi bosi seu contendi nci at unus cantu arrexonamentus lestrus de fai:

1 - Aìnturu de is primus 10 de sa classìfica finali (avotaus de una giuria de digeis mannus), in prus chi is duus prus avotaus in s'arretza, nemus at imperau discus "berus"! Totus ant imperau is discus "a còixi" (DVS, digital vinyl system). S'arrexoni iat a podi essi sa comodidadi de custu sistema chi ti pirmit de fai totu su scioru cun duus discus e, in prus, de no fai sartiai sa puntina (Relative Mode) e de giogai cun is atacus (Lèssicu 1.7).

2 - Totus (e mi-ddus apu castiaus totus) ant imperau Serato Scratch Live e duncas su prus cuncurrenti mannu Traktor no ndi bessit beni-beni a pubricidadi. Custu bolit nai chi a is digei de batalla ddi praxit Serato e, sigomenti ca 9/12 funt europeus, no fait nimancu a nai chi funt "americanus" e si sciri ca preferrint a Serato (Traktor est prus imperau in Europa e est su programa "meri" po is digeis de mùsica eletrònica in generali).

3 - Torrendi a su puntu duus: forsis poita ca 11/12 imperant unu mixer Rane cun sa scheda de Serato aìnturu (TTM 57SL, Sixty-One o Sixty Two)?

4 - Technics arrennat! Foras de Fong Fong chi at imperau una pariga de PDX Vestax e de s'amigu Dj Cordella (ITA) chi at imperau una pariga de Numark TTX (e pigau su de otu postus, mancai iat a essi stètiu prus giustu su de cuàturu!) su Technics at fatu bella amosta in dexi sciorus. Mi parrit, duncas, chi custu pratu, foras de produsidura de una pariga de annus, siat torrau a essi su modellu o "standard", comenti narant in italianu puru.

5 - No si biint agiumai prus is "giogus de corpus" chi, una borta, fiant parti importanti meda de su scioru. Eja, ddu sciu chi fiat totu scena e chi seu antigu ma ita si depu nau: mi praxint! Gei ant a torrai cussus puru, trancuillus!

6 - Totu is scioru funt bastantis tènnicus e su livelli est artu perou, a livellu de musicalidadi, funt cosa de s'arrosci a lestru, ca sonant perfetus che a un'arregistratzioni e calincunu nci at postu a su dubstep puru! 'stìtzia ddu c... bah bah! Ma unu giai ddu bollu a sarvai: Dj Vekked (CAN), chi depiat arribai assumancu segundu. At fatu unu scioru de si-ndi lingi is didus e, difatis, si-ddu apoddu innoi asuta po serrai custu post a sa manna!

Lèssicu 1.8

(su) GIOGU DE CORPUS: in ingresu est BODY TRICK e funt totu cussus is movimentus spetacularis e agiumai de "circu" chi su digei fait apitzus de su mixer e de is pratus po spantai pùbricu e aversantis. Custu est un'esèmpru (R.I.P. Roc Raida).

2Jul/120

Pregontus: SIMO G

null

Duncas, puru chi cun custa basca no est bellu meda a abarrai a scriri cun su computer callenti che su forru de su pani, depeus torrai (amarolla) a pubricai noas in su blog, ca cosa de nai e novidadis nci nd'at a fuliadura. Eus donau giai sa noa spantosa de su tataresu Simo G campioni friscu-friscu de su Killa Combat Scratch Italia 2012, cosa importanti meda poita ca fiat de su 1997, candu Dj Nike iat bintu su DMC Italy, chi sa Sardìnnia no teniat unu campioni “natzionali” (eus a nai...) e insaras pubricaus unu pregontu chi ddi emus fatu in su mesi de Idas passau, candu iat bintu su de tres postus mancai, a parrimentu miu, fiat stètiu su mellus). No est cosa “impruinada” piciocus ma, antzis, est unu pregontu bellu meda chi s'amigu Simo G si contat cosas medas apitzus de su tretu chi at fatu in annus, de is garas, de sa stòria sua e unas cantu chistionis tènnicas puru, interessantis meda e sigomenti est unu Campioni (comenti eus nau ainnantis) si-ddu merescit totu chi bosàterus si-ddu ligeis!

SU DIGEI: Ses arribau su de tres (ma su primu po mei!) a s'IDA ITALY “ The Scratch!”, un'arresultau bonu meda: ita àteras garas as fatu e comenti funt andadas?

SIMO G: Finsas a imoi (mesi de idas de su 2011 – nota de Su Digei) creu de ai fatu unus dexi garas prus o mancu. Sa primu est stètia “Handle with care” in su 2007 in Palermo, s'intzimia chi m'at pirmìtiu de nci bintrai in su giru de is grandu “scarrafiadoris” e de de proai a m'acarai. Emu pèrdiu a is de cuàturu de finali. Totu est inghitzau de inguni. Gràtzias a s'apretu e a sa genti chi m'at apretziau apu sighiu a participai a dònnia gara, andendi a fai duas bortas su “Gain Skillz”, arribendi a sa semi-finali, e a editzionis meda de su DMC Italy e ITF/IDA. A s'editzioni IDA/ITF de su 2008 apu bintu su segundu postu, arrasighendi su tìtulu italianu e s' 'intrada a s'IDA WORLD.

SU DIGEI: Pregunta retòrica: cantu funt penalizaus is digeis sardu acaraus a-i cussus “continentalis” e de ita, a primìtziu?

SIMO G: Pensu chi is digeis sardus siant penalizaus poita ca est prus difìcili a si movi, acaraus a-i cussus chi podint pigai una màchina o unu trenu. E duncas, in su matessi tempus, est prus pagu fàcili a abarrai in cuntatu cun sa cultura de su “Turntablism”, a cuncordai atòbius dònnia dii po cundividi bideas, po fai allenamentu, ecc.. In prus, is pagus acadèssius mannus anca custa cultura tenit bonu acatu ddus faint in su Nord, solitamenti. Ma seus assortaus cun Internet chi oindii est fundamentali e est un'agiudu po totu is sardus e no sceti!

SU DIGEI: Andaus a is cositeddas tènnicas: in custu ùrtimu vìdiu t'apu biu amelliorau meda in lestresa, precisioni (no ddoi est una sbauladura) e variedadis de cumbinassionis, unas cantu fluentis meda. Cali est su segretu, in prus chi “impìnniu e allenamentu”, e calis funt stètias is mitzas spiradoras po amellorai su stili? In prus chi Q-Bert, craramenti! No at a essi chi ses assentau a sa QSU - Qbert Skratch University???!!!

SIMO G: Sendi parti de una truma che a sa QSU, acanta meda a Q-Bert, siguramenti sa vida mia iat a essi cambiada! Deu pensu chi s'allenamentu de dònnia dii, su chi est 10 mìnutus sceti puru, siat utilosu. Tocat a sighiri s'originalidadi e a lassai logu a sa manera nosta de pensai poita, a parrimentu miu, su cumportamentu nostu apitzus de is pratus est su reflessu de sa manera nosta d'essi. No ddoi at unu segretu...depu amiti, perou, chi ai participau a is garas e ai sonau impari a medas scarrafiadoris m'at agiudau achiriri musicalidadi, stili e, pruschetotu, tènnicas diferentis. Custu serbit meda po s'amelliorai e lompi a livellus sèmpiri prus artus.

SU DIGEI: Chistioni liada a sa pregunta de prima: cantu t'at agiudai su de ai cambiau su mixer e, duncas, su crossfader? Chi m'arregordu beni teniast unu Vestax 07 Samurai.

SIMO G: Eja, est berus, tenemu su Vestax 07 Samurai ma mi-ddu arregordu cun pagu carìnniu. M'est pràxiu de prus meda su Vestax 07 versioni “clàssica”, chi apu tentu prus ainnantis. Est mellus a essi “gurreis” de unu fader chi a ndi essi “tzeracus”. De unus cantu annus seu imperendu su Rane TTM-56 e poi mei est su mellus mixer po scarrafiai po su chi pertocat sa tennologia. M'at agiudau a fai prus lìmpias e precisas is atzas intra de unu sonu e s'àteru.

SU DIGEI: Pregunta pretzisa: cantu est stètiu importanti fradili tuu Gabriele po t'apegai a su scratch? Gabriele est unu grandu-grandu-grandu digei, lassa-mi-ddu nai!

SIMO G: Naras beni meda: Gabriele est unu grandu digei, cun esperièntzia manna e gana de imbentai meda. A piticheddus femus impari fitianamenti. Apu inghitzau a ascurtai mùsica Hip Hop a s'edadi de 11 annus e is scarràfius chi intendemu in is cantzonis m'acisànt. A nai sa beridadi no cumprendemu ita fiant perou spantasiamu e biemu, in su matessi tempus, totu comenti a una cosa mala a sighiri, chi bolemu ma chi no podemu tenni. Apustis de unus cantu annus emu biu chi fradili miu Gabriele teniat in s'aposentu cosa sua dus pratus “Gemini” e ddu biemu scarrafiendi. M'arregordu ancora cussu momentu comenti chi fessit oi. Emu pensau luegus: “ma insaras una console no est una cosa difìcili a tenni”. Apustis de pagu tempus apu comporau is primus pratus mius “Stanton STR8-50” a tiradura a cingra e su primu mixer, unu Gemini. Mi praxiat a amesturai sa mùsica de discoteca e pensamu chi iat a essi stètia s'arruga mia ma, ascurtendi s'Hip Hop, castiendi a fradili miu scarrafiendi e intendendi-ddu chistionendi apitzus de is tènnicas chi teniant is digeis italianus e de su mundu, apu cambiau s'interessu miu. Forsis, chena de Gabriele, imoi femu faendi àtera cosa apitzus de is pratus.

SU DIGEI: Imperas unu DVS? Chi eja, cali e poita ddu as sceberau?

SIMO G: Nou, no ndi imperu, ma s' 'idea de ndi tenni unu no mi despraxit po nudda. Serato opuru Traktor: est aguali. Seu curiosu meda de ddus proai totu e is duus po ddus acarai. Se tennologia oindii est cosa de timi!

SU DIGEI: Po su chi pertocat su giogulamentu: ndi fais in is sciorus cosa tua? Opuru est una cosa chi no t'interessat? A mei, po nai, mi praxint is sciorus beni fatus ma no apu proau mai a fai giogulamentus.

SIMO G: Mi seu interessau a su giogulamentu po is primus duus annus chi apu fatu apitzus de is pratus. Castiamu e castiamu torra is vìdius de is garas bècias de su DMC de is annus '90. Apu proau e proau torra ma a s'acabu apu cumprèndiu chi...o scarrafiamu...o nudda. De ndi tenni duus de pratus seu arribau a ndi tenni unu sceti.

SU DIGEI: Nci funt fueddus in su sùspiu/dialetu tataresu chi imperas impari a is àterus digeis e/o cun is MCs po nai “pratu”, “mixer”, “cùfias”, ecc.?

SIMO G: Sinceramenti: no imperu fueddus particularis, foras de is chi apu nau innantis. Calincuna borta ddi nau “ciambellone” a su PDX 2000 miu, ma sceti poita is pratus de sa Vestax tenint custa simbillàntzia particulari po sa forma insoru.

SU DIGEI: Foras de Q-Bert, cali est su prus digei forti in su mundu imoi a parrimentu tuu? E poita?

SIMO G: Foras de Q-Bert is digeis chi m'ant turmentau de prus funt stètius: D-Styles, Excess e Toadstyle, ma no bollu nai chi unu de-i custus est “su prus forti” imoi. Su scratch s'amanniat aici lestramenti chi is tìtulus chi nci bolint po essi unu “mostru” cambiant e mudant. Dj Rafik, a parrimentu miu, tenit unu stilu, un'arritmu, una mètrica e una musicalidadi originalis e raras chi s'amesturant cun tènnicas a s'avanguàrdia siat lentas chi lestras e complicadas. In is sciorus e in su stili lìberu est cosa de timi.

SU DIGEI: S'ùrtimu pregunta iper-tènnica (chi si-nd'at a cumprendi su sentidu in is artìculus benidoris): tui scarràfias cun sa manu dereta apitzus de su fader “deretu” (chi no scieis o arregordais ita bolit nai castiai-sì custu artìculu bèciu) ma cali est sa manu tua “forti” in sa vida de dònnia dii? Scis scarrafiai unu pogheddu cun sa manu manca?
Gràtzias meda!

SIMO G: Sa manu mia “forti” est sa manu dereta; deu scarràfiu cun custa e imperendi sa manu manca apitzus de su mixer. No emu a essi àbili a fai a s'imbressi, antzis, m'iat a parri de ndi torrai “a s'inghitzu” e emu a essi bonu sceti a spostai su fader de una parti a s'àtera.

Cuntatus:

Facebook

Youtube

Lèssicu 1.6

(sa) CONSOLE: a-i bortas ligeus e intendeus puru "consolle", a sa manera italiana. Est unu fueddu frantzesu chi si narat po una spècia particulari de mobìllia chi est a tipu mesa "frunia" e, in su mundu de sa mùsica, s'imperat po inditai s'arrocu de is ainas de su digei e sa mobìllia anca funt postas. Sigomenti ca mi parrit chi in sardu no nci at unu fueddu bonu po una tradusidura sèria, deu nau de aguantai a su fueddu frantzesu.

TIRADURA A CINGRA: s'arroda de su pratu tenit unu "motori" po girai chi podit essi a tiradura dereta (sa prus forti e professionali), est a nai chi su motori est acapiau a s'arroda de su pratu, e sa tiradura a cingra (prus dèbili ma bona meda po is pratus imperaus de is amadoris de sa calidadi àudio), chi tenit unu motori scapiau de s'arroda, imperendi a una cingra po trasmiti su movimentu.

4Dez/110

DJ Vajra (USA) – Scioru bincidori de su 2011 DMC World Championship

Custu est su scioru de Dj Vajra chi at bintu su DMC World Championship 2011, sa prus batalla importanti chi unu digei podit fai. Torraus gràtzias a Vajra po su pregontu chi dd'eus fatu in su mesi de Cabudanni, candu no fiat ancora campioni de su DMC ma, siguramenti, ddu fiat giai de gentilesa! Castiai-si-ddi e gosai-si-ddu:

8Okt/110

Finalis Mondialis de su DMC 2011: is arresultaus

Eriseru, in Londra, is batallas de is finalis mondialis de su DMC World Dj Championships 2001 ant nau chini funt is campionis e ddoi funt unas cantu sorpresas.

Scioru clàssicu de 6 min.:

1: DJ Vajra - Chris Vajra Karns - USA
2: Izoh - Japan
3: Co-Ma - Japan
4: JFB - England
5: Erick Jay - Brazil
6: DJ Graded - Denmark

A disfida (Supremacy):

1: DJ Nelson - France
2: Norihito - Japan

Trumas (Team):

1: Kireek - Japan
2: Cla Leste - Brazil
3: BattleStar - USA

E duncas, s'amigu americanu Dj Vajra intrat in sa "Hall of fame" de is grandus digeis de batalla e, chena de brullas, nosu si-dda femus fragada chi acabàt diaci. Difatis Chris no est prus unu piciocheddu (crassi de su '76) e, sigoramenti, teniat su bisu de essi campioni DMC finsas de candu fiat piciocheddu, candu custa batalla fiat s'ùnica e chini dda binciat fiat arreconnotu comenti a su mellus digei. Sa curiosidadi de biri su scioru chi at fatu est manna!

Ligendi is nòminis de is bincidoris is arrexonamentus de fai lestramenti funt:

- su Giaponi artziat in su palcu in dònnia categoria, bincendi (facilmenti) cussa de is Trumas cun Kireek (chi difendiant su tìtulu), pighendi su segundu scalinu in sa Disfida cun Norihito e po finsas su segundu e su de tres scalinu in su Scioru Clàssicu de 6 minutus cun Izoh e Co-Ma! Balla, chi fiant is olimpiadis iant stètius: 1 oru, 2 pratas e 1 brunzu!

- sa Frantza bincit, comenti a sa sòlita, bincit assumancu unu tìtulu (Dj Nelson in sa disfida);

- su Brasili (!) pigat su segundu scalinu in categoria Trumas cun Cla Leste e su de cincu in su Scioru Clàssicu 6 min. cun Erick Jay.

Ocannu, insaras, is giogus de is batallas DMC funt spaciaus e ddoi funt is campionis. Abetaus is vìdios e totu is novas po biri e cumprendi mellus comenti est stètia tennicamenti e musicalmenti sa cosa.

Norabonas a totu is bincidoris de Su Digei!