Pregontus: SIMO G

Duncas, puru chi cun custa basca no est bellu meda a abarrai a scriri cun su computer callenti che su forru de su pani, depeus torrai (amarolla) a pubricai noas in su blog, ca cosa de nai e novidadis nci nd'at a fuliadura. Eus donau giai sa noa spantosa de su tataresu Simo G campioni friscu-friscu de su Killa Combat Scratch Italia 2012, cosa importanti meda poita ca fiat de su 1997, candu Dj Nike iat bintu su DMC Italy, chi sa Sardìnnia no teniat unu campioni “natzionali” (eus a nai...) e insaras pubricaus unu pregontu chi ddi emus fatu in su mesi de Idas passau, candu iat bintu su de tres postus mancai, a parrimentu miu, fiat stètiu su mellus). No est cosa “impruinada” piciocus ma, antzis, est unu pregontu bellu meda chi s'amigu Simo G si contat cosas medas apitzus de su tretu chi at fatu in annus, de is garas, de sa stòria sua e unas cantu chistionis tènnicas puru, interessantis meda e sigomenti est unu Campioni (comenti eus nau ainnantis) si-ddu merescit totu chi bosàterus si-ddu ligeis!

SU DIGEI: Ses arribau su de tres (ma su primu po mei!) a s'IDA ITALY “ The Scratch!”, un'arresultau bonu meda: ita àteras garas as fatu e comenti funt andadas?

SIMO G: Finsas a imoi (mesi de idas de su 2011 – nota de Su Digei) creu de ai fatu unus dexi garas prus o mancu. Sa primu est stètia “Handle with care” in su 2007 in Palermo, s'intzimia chi m'at pirmìtiu de nci bintrai in su giru de is grandu “scarrafiadoris” e de de proai a m'acarai. Emu pèrdiu a is de cuàturu de finali. Totu est inghitzau de inguni. Gràtzias a s'apretu e a sa genti chi m'at apretziau apu sighiu a participai a dònnia gara, andendi a fai duas bortas su “Gain Skillz”, arribendi a sa semi-finali, e a editzionis meda de su DMC Italy e ITF/IDA. A s'editzioni IDA/ITF de su 2008 apu bintu su segundu postu, arrasighendi su tìtulu italianu e s' 'intrada a s'IDA WORLD.

SU DIGEI: Pregunta retòrica: cantu funt penalizaus is digeis sardu acaraus a-i cussus “continentalis” e de ita, a primìtziu?

SIMO G: Pensu chi is digeis sardus siant penalizaus poita ca est prus difìcili a si movi, acaraus a-i cussus chi podint pigai una màchina o unu trenu. E duncas, in su matessi tempus, est prus pagu fàcili a abarrai in cuntatu cun sa cultura de su “Turntablism”, a cuncordai atòbius dònnia dii po cundividi bideas, po fai allenamentu, ecc.. In prus, is pagus acadèssius mannus anca custa cultura tenit bonu acatu ddus faint in su Nord, solitamenti. Ma seus assortaus cun Internet chi oindii est fundamentali e est un'agiudu po totu is sardus e no sceti!

SU DIGEI: Andaus a is cositeddas tènnicas: in custu ùrtimu vìdiu t'apu biu amelliorau meda in lestresa, precisioni (no ddoi est una sbauladura) e variedadis de cumbinassionis, unas cantu fluentis meda. Cali est su segretu, in prus chi “impìnniu e allenamentu”, e calis funt stètias is mitzas spiradoras po amellorai su stili? In prus chi Q-Bert, craramenti! No at a essi chi ses assentau a sa QSU - Qbert Skratch University???!!!

SIMO G: Sendi parti de una truma che a sa QSU, acanta meda a Q-Bert, siguramenti sa vida mia iat a essi cambiada! Deu pensu chi s'allenamentu de dònnia dii, su chi est 10 mìnutus sceti puru, siat utilosu. Tocat a sighiri s'originalidadi e a lassai logu a sa manera nosta de pensai poita, a parrimentu miu, su cumportamentu nostu apitzus de is pratus est su reflessu de sa manera nosta d'essi. No ddoi at unu segretu...depu amiti, perou, chi ai participau a is garas e ai sonau impari a medas scarrafiadoris m'at agiudau achiriri musicalidadi, stili e, pruschetotu, tènnicas diferentis. Custu serbit meda po s'amelliorai e lompi a livellus sèmpiri prus artus.

SU DIGEI: Chistioni liada a sa pregunta de prima: cantu t'at agiudai su de ai cambiau su mixer e, duncas, su crossfader? Chi m'arregordu beni teniast unu Vestax 07 Samurai.

SIMO G: Eja, est berus, tenemu su Vestax 07 Samurai ma mi-ddu arregordu cun pagu carìnniu. M'est pràxiu de prus meda su Vestax 07 versioni “clàssica”, chi apu tentu prus ainnantis. Est mellus a essi “gurreis” de unu fader chi a ndi essi “tzeracus”. De unus cantu annus seu imperendu su Rane TTM-56 e poi mei est su mellus mixer po scarrafiai po su chi pertocat sa tennologia. M'at agiudau a fai prus lìmpias e precisas is atzas intra de unu sonu e s'àteru.

SU DIGEI: Pregunta pretzisa: cantu est stètiu importanti fradili tuu Gabriele po t'apegai a su scratch? Gabriele est unu grandu-grandu-grandu digei, lassa-mi-ddu nai!

SIMO G: Naras beni meda: Gabriele est unu grandu digei, cun esperièntzia manna e gana de imbentai meda. A piticheddus femus impari fitianamenti. Apu inghitzau a ascurtai mùsica Hip Hop a s'edadi de 11 annus e is scarràfius chi intendemu in is cantzonis m'acisànt. A nai sa beridadi no cumprendemu ita fiant perou spantasiamu e biemu, in su matessi tempus, totu comenti a una cosa mala a sighiri, chi bolemu ma chi no podemu tenni. Apustis de unus cantu annus emu biu chi fradili miu Gabriele teniat in s'aposentu cosa sua dus pratus “Gemini” e ddu biemu scarrafiendi. M'arregordu ancora cussu momentu comenti chi fessit oi. Emu pensau luegus: “ma insaras una console no est una cosa difìcili a tenni”. Apustis de pagu tempus apu comporau is primus pratus mius “Stanton STR8-50” a tiradura a cingra e su primu mixer, unu Gemini. Mi praxiat a amesturai sa mùsica de discoteca e pensamu chi iat a essi stètia s'arruga mia ma, ascurtendi s'Hip Hop, castiendi a fradili miu scarrafiendi e intendendi-ddu chistionendi apitzus de is tènnicas chi teniant is digeis italianus e de su mundu, apu cambiau s'interessu miu. Forsis, chena de Gabriele, imoi femu faendi àtera cosa apitzus de is pratus.

SU DIGEI: Imperas unu DVS? Chi eja, cali e poita ddu as sceberau?

SIMO G: Nou, no ndi imperu, ma s' 'idea de ndi tenni unu no mi despraxit po nudda. Serato opuru Traktor: est aguali. Seu curiosu meda de ddus proai totu e is duus po ddus acarai. Se tennologia oindii est cosa de timi!

SU DIGEI: Po su chi pertocat su giogulamentu: ndi fais in is sciorus cosa tua? Opuru est una cosa chi no t'interessat? A mei, po nai, mi praxint is sciorus beni fatus ma no apu proau mai a fai giogulamentus.

SIMO G: Mi seu interessau a su giogulamentu po is primus duus annus chi apu fatu apitzus de is pratus. Castiamu e castiamu torra is vìdius de is garas bècias de su DMC de is annus '90. Apu proau e proau torra ma a s'acabu apu cumprèndiu chi...o scarrafiamu...o nudda. De ndi tenni duus de pratus seu arribau a ndi tenni unu sceti.

SU DIGEI: Nci funt fueddus in su sùspiu/dialetu tataresu chi imperas impari a is àterus digeis e/o cun is MCs po nai “pratu”, “mixer”, “cùfias”, ecc.?

SIMO G: Sinceramenti: no imperu fueddus particularis, foras de is chi apu nau innantis. Calincuna borta ddi nau “ciambellone” a su PDX 2000 miu, ma sceti poita is pratus de sa Vestax tenint custa simbillàntzia particulari po sa forma insoru.

SU DIGEI: Foras de Q-Bert, cali est su prus digei forti in su mundu imoi a parrimentu tuu? E poita?

SIMO G: Foras de Q-Bert is digeis chi m'ant turmentau de prus funt stètius: D-Styles, Excess e Toadstyle, ma no bollu nai chi unu de-i custus est “su prus forti” imoi. Su scratch s'amanniat aici lestramenti chi is tìtulus chi nci bolint po essi unu “mostru” cambiant e mudant. Dj Rafik, a parrimentu miu, tenit unu stilu, un'arritmu, una mètrica e una musicalidadi originalis e raras chi s'amesturant cun tènnicas a s'avanguàrdia siat lentas chi lestras e complicadas. In is sciorus e in su stili lìberu est cosa de timi.

SU DIGEI: S'ùrtimu pregunta iper-tènnica (chi si-nd'at a cumprendi su sentidu in is artìculus benidoris): tui scarràfias cun sa manu dereta apitzus de su fader “deretu” (chi no scieis o arregordais ita bolit nai castiai-sì custu artìculu bèciu) ma cali est sa manu tua “forti” in sa vida de dònnia dii? Scis scarrafiai unu pogheddu cun sa manu manca?
Gràtzias meda!

SIMO G: Sa manu mia “forti” est sa manu dereta; deu scarràfiu cun custa e imperendi sa manu manca apitzus de su mixer. No emu a essi àbili a fai a s'imbressi, antzis, m'iat a parri de ndi torrai “a s'inghitzu” e emu a essi bonu sceti a spostai su fader de una parti a s'àtera.

Cuntatus:

Facebook

Youtube

Lèssicu 1.6

(sa) CONSOLE: a-i bortas ligeus e intendeus puru "consolle", a sa manera italiana. Est unu fueddu frantzesu chi si narat po una spècia particulari de mobìllia chi est a tipu mesa "frunia" e, in su mundu de sa mùsica, s'imperat po inditai s'arrocu de is ainas de su digei e sa mobìllia anca funt postas. Sigomenti ca mi parrit chi in sardu no nci at unu fueddu bonu po una tradusidura sèria, deu nau de aguantai a su fueddu frantzesu.

TIRADURA A CINGRA: s'arroda de su pratu tenit unu "motori" po girai chi podit essi a tiradura dereta (sa prus forti e professionali), est a nai chi su motori est acapiau a s'arroda de su pratu, e sa tiradura a cingra (prus dèbili ma bona meda po is pratus imperaus de is amadoris de sa calidadi àudio), chi tenit unu motori scapiau de s'arroda, imperendi a una cingra po trasmiti su movimentu.