Su 2014 DMC Online DJ Championship
Ocannu puru si fait su 2014 DMC Online Dj Championship, forsis sa prus batalla manna de digeis in s'arretza. Is digeis de totu su mundu ant a podi participai intreghendi unu scioru insoru de duus minutus bia Youtube, est a nai sa democratzia sintzilla! Sa giuria? Totu is chi ant ddus castiai ant a podi votai de su giassu de su DMC (unu votu sceti po dònnia digei chi s'at a praxi). Imoi seus a su primu giru; a s'acabu de totu su tretu su bincidori at a tenni s'onori de si-dda podi gherrai cun totu is bincidoris de is DMC natzionalis a sa batalla finali mondiali chi s'at a fai in s'atòngiu. Nosu siguramenti no eus a participai ca si praxit a scriri e a biri vìdius ma no a fai sbianchimentu! In Sardìnnia gei nci-nd'at de digeis giòvunus e bravus... spereus chi si-dda tentint e chi amostint, cun is tènnicas de scarràfiu e de giogulamentu insoru, chi innoi puru nci at genti bona meda.
Jon1st (UK) bincit sa de tres „DMC Online DJ Championships“
Ocannu puru sa DMC at fatu sa batalla in s'arretza e donau visibilidadi a unu sciacumannu de digeis de dònnia parti de su mundu (Brasili, Cile, ecc.) ma, a s'acabu, s'Europa nd'at bogau su campioni nou. In su 2012 fiat stètiu su franzesu Fong Fong a binci ma ocannu sa Franza pìgat su de noi postus sceti cun Dj Groove Sparkz (stilosu meda cun is scarràfius e pretzisu meda ma su scioru cosa sua, a s'acabu, est stètiu unu pogheddu "bambu" e chena de naturali); s'Arrènniu Uniu, invecis, bìncit cun Jon1st (scioru lìmpiu, unas cantu tènnicas friscas, scioberu musicali modernu-eletrònicu ma de cussus chi no ti-nd'arroscis apustis de binti segundus!) e pìgat su de tres (Ritchie Ruftone) e su de seti (Dj Rasp) postus puru. A su segundu postu agataus s'amigu canadesu Dj Vekked (chi ddi eus fatu unu pregontu in su mesi de Gennàrgiu), campioni 2012 IDA Technical e DMC Supremacy. Innoi is classìficas finalis cun is avotus de is giugis e de su pùblicu (Jon1st at bintu totu e duas, craramenti) e bosi cumbidu a ddas acarai e a fai unus cantu de arrexonamentus:
http://dmcdjonline.com/video.php?t=results
Imoi a Dj Jon1st ddi tòcat a batallai a sa finali mondiali DMC su 5 de su mesi de ladàmini a s'Indig02 de Londra!
Fong Fong (FRA) bincit sa segundu “DMC Online DJ Championships“
Sa segundu batalla manna in s'arretza "DMC Online Dj Championships" est spaciada e s'at nau chini est su bincidori de su 2012: Fong Fong (FRA), chi s'annu passau iat pigau su de tres postus. Bellu scioru lestru, lìmpiu e tènnicu de custu piciocu bravu e pibirudu, chi ddi praxit a si trassai (òmini lupu, Scream, Homer Simpson, ecc.) e a fai "su scimpru" in is vìdius cosa sua, in s'interis chi est scarrafiendi cun seriedadi pròpia de su campioni... e nci est lòmpiu a ddu essi! Imoi si-dda at a depi gherrai in sa finali de su DMC "normali", eus a nai, in su mesi de Ladàmini in Londra.
De batallas in s'arretza ndi eus chistionau giai meda e, comenti emu nau, funt amanniendi-sì e is digeis potentis si-nci funt amollendi, ca donant visibilidadi, faint lompi a is batallas che a su DMC e si bincint prèmius puru (dinai, ainas, ecc.). Apitzus de custa chi bosi seu contendi nci at unus cantu arrexonamentus lestrus de fai:
1 - Aìnturu de is primus 10 de sa classìfica finali (avotaus de una giuria de digeis mannus), in prus chi is duus prus avotaus in s'arretza, nemus at imperau discus "berus"! Totus ant imperau is discus "a còixi" (DVS, digital vinyl system). S'arrexoni iat a podi essi sa comodidadi de custu sistema chi ti pirmit de fai totu su scioru cun duus discus e, in prus, de no fai sartiai sa puntina (Relative Mode) e de giogai cun is atacus (Lèssicu 1.7).
2 - Totus (e mi-ddus apu castiaus totus) ant imperau Serato Scratch Live e duncas su prus cuncurrenti mannu Traktor no ndi bessit beni-beni a pubricidadi. Custu bolit nai chi a is digei de batalla ddi praxit Serato e, sigomenti ca 9/12 funt europeus, no fait nimancu a nai chi funt "americanus" e si sciri ca preferrint a Serato (Traktor est prus imperau in Europa e est su programa "meri" po is digeis de mùsica eletrònica in generali).
3 - Torrendi a su puntu duus: forsis poita ca 11/12 imperant unu mixer Rane cun sa scheda de Serato aìnturu (TTM 57SL, Sixty-One o Sixty Two)?
4 - Technics arrennat! Foras de Fong Fong chi at imperau una pariga de PDX Vestax e de s'amigu Dj Cordella (ITA) chi at imperau una pariga de Numark TTX (e pigau su de otu postus, mancai iat a essi stètiu prus giustu su de cuàturu!) su Technics at fatu bella amosta in dexi sciorus. Mi parrit, duncas, chi custu pratu, foras de produsidura de una pariga de annus, siat torrau a essi su modellu o "standard", comenti narant in italianu puru.
5 - No si biint agiumai prus is "giogus de corpus" chi, una borta, fiant parti importanti meda de su scioru. Eja, ddu sciu chi fiat totu scena e chi seu antigu ma ita si depu nau: mi praxint! Gei ant a torrai cussus puru, trancuillus!
6 - Totu is scioru funt bastantis tènnicus e su livelli est artu perou, a livellu de musicalidadi, funt cosa de s'arrosci a lestru, ca sonant perfetus che a un'arregistratzioni e calincunu nci at postu a su dubstep puru! 'stìtzia ddu c... bah bah! Ma unu giai ddu bollu a sarvai: Dj Vekked (CAN), chi depiat arribai assumancu segundu. At fatu unu scioru de si-ndi lingi is didus e, difatis, si-ddu apoddu innoi asuta po serrai custu post a sa manna!
Lèssicu 1.8
(su) GIOGU DE CORPUS: in ingresu est BODY TRICK e funt totu cussus is movimentus spetacularis e agiumai de "circu" chi su digei fait apitzus de su mixer e de is pratus po spantai pùbricu e aversantis. Custu est un'esèmpru (R.I.P. Roc Raida).
Avotai genti, avotai!
Chi si fait praxeri podeis avotai a Dj Cordella chi est intra de is 22 digeis chi funt lòmpius a-i custa torrada. Su 30 de Austu is 10 digeis chi ant a airi arriciu prus avotus ant a si-dda gherrai in d-una batalla manna finali, chi ndi at a bogai su primu "DMC Online DJ Champion 2011". Su Digei narat de avotai a Dj Cordella, ca ddi iat fatu unu pregontu de pagu e nosi pensaus chi si-ddu merescit custu avotixeddu! Ajò, amollai-si-nci!
Custu est su bivimentu po avotai.
Batallas in sa retza de DMC – sa de cuàturu noas
In s'interis chi femus faendi pregontus aforas de sa Sardìnnia e chistionendi de cosas tènnicas meda, sa batalla "DMC Online Dj Championships" fiat sighendi su tretu suu e, duncas, andaus a castiai unu pogheddu aundi est lòmpia e cali est sa situatzioni: a sa de dexi torrada est "Dj Fong Fong (Frantza)" chi bincit, cun d-unu scioru stravanau! Castiai-si-ddu circhendi a no arriri tropu e a si gosai sa fantasia, sa precisioni e sa tènnica de-i custu macu:
Passat a sa torrada afatanti "Dj Snayk Eyez (USA)", dj underground de batalla chi no s'intendiat de diora (fiat connotu meda unus dexi annus a oi), chi at amostau stili de scola bècia amesturau a tènnicas noas cun s'acostamentu cràssicu de is digeis americanus chi funt "nàscius" in is annus '90 aìnturu de su mundu de s'hip hop, candu is batallas fiant liadas meda a-i cussa cultura:
Sa giuria, comenti a su sòlitu, fiat de ddi portai arrespetu mannu:
DJ CO-MA (Giaponi)- DMC Battle For World Supremacy Champion 2006
Pro Zeiko (Germània) - DMC Battle For World Supremacy Champion 2005
Cutmaster Swift (Arrènniu Uniu) - DMC World Champion 1989
Batallas in sa retza de DMC – sa de tres noas
Sa batalla "DMC Online DJ Championships", chi seus sighendi de custu blog, est lompendi a essi interessanti meda, o piciocus! Un'àtera sentèntzia cun spantu: "Ritchie Ruftone (UK)" est su bincidori e "Dj Cordella (ITA)", italianu pulliesu de Taviano (LE), passat a sa torrada afatanti comenti a su mellus apalas de su primu!. M'eis a nai: "e poita totu custu infogu?". Pruschetotu poita ca Cordella est grandu sperimentadori e presentadori de ainas de digei (Alarmusic, Numark, ecc.) e puru poita ca tenit cussu "tocu" de scola bècia in is sciorus cosa sua chi mi fait praxeri meda a intendi. Balla, custa borta puru sa giuria fiat cosa de timi:
DJ Shiftee (USA) - DMC World Champion 2009 / DMC Battle for Supremacy Champion 2007
DJ Yasa (Japan) - 4 x DMC World Team Champions
DJ Dopey (Canada) - DMC World Champion 2003
Lèssicu 1.0
(sa) PRESENTADA: candu unu digei spertu provat un'aina e ndi scriri ita ndi pentzat, chi siat po unu blog tènnicu, unu giorronali de su setori professionali, ecc.. In su mundu de su digei is presentadas e is vìdeo-presentadas funt importantis meda poita ca medas bortas si tocat a comporai un'aina in s'arretza, chena de dda podi provai.
Batallas in sa retza de DMC – sa segundu noa
A s'acabu de sa segundu torrada nci funt bessius duus digeis chi ant a si-dda gherrai in sa finali de Austu de sa batalla "DMC Online DJ Championships": "Dj Rasp (UK)", chi est su bincidori, e "Loop Skywalker the turntable Jedi (UK)", chi passat a sa torrada afatanti comenti a su mellus apalas de su primu (britànnicu issu puru). Is sciorus de custus duus piciocus no m'ant fatu sartiai de sa cadira perou chi custa giuria at ditzidiu aici mi tocat a mi citiri:
DJ Noize - 1996 DMC World Champion
DJ Kentaro - 2002 DMC World Champion
DJ Pfel (C2C) - 4 x DMC World Team Champion
Lèssicu 0.9
(sa) GIURIA: in dònnia batalla de digeis sa giuria avotat is sciorus e pigat is detzididuras. Chi sa batalla est internatzionali-ofitziali is arrègulas ant a essi is matessis in dònnia logu (po es.: su DMC in Tailàndia at a essi fatu comenti a su DMC de su Canada).
Batallas in sa retza de DMC – sa primu noa
Duncas: sa batalla "DMC Online DJ Championships" est inghitzada e sa primu torrada tenit giai is bincidoris, chi ant a essi arrenomenaus giòbia su 17 de custu mesi. Sa curiosidadi est manna poita ca, comenti nàrat sa noa ofitziali de su DMC, no scireus ita at a fai chini nci at a bessiri: si-dda ant a gherrai cun su matessi video? Ant a arregistrai duus minutus nous? Opuru calincunu at a lassai perdi? Deu apu castiau totu is video (gana meda ndi tenemu, berus?) e avotau chena de generosidadi e, a nai sa beridadi, s'ùnicu chi at fatu duus minutus de fogu est stètiu Dj Unkut (Germània), chi cun d-unu scioru de lestresa, precisioni e tènnica apitzus de is sonus cuncordaus de Le Jad (produsidori famau meda po is basis potentis, siat po is batallas chi po nci arrepai asuba) s'est guadangiau is cincu steddus cosa mia. Castiai-si-ddu:
Tanti po essi precisu, si fatzu apubai ca est imperendi su mixer nou de sa Vestax, su PMC 05 pro IV (gei ddu eus a biri prus ananti) e Traktor Scratch Pro impari a su controlladori Maschine (totu e duus de sa Native Instruments); no creu chi ddu fetzat po debadas ca Vestax, Zoo York e àteras firmas puru ddi faint de amparadoris (castiai is apositzus in su sprigu!).
Po torrai a sa chistioni de su post e dda serrai cun lestresa: sa DMC si fait sciri chi at tentu 50.000 vìsitas in duas cidas e chi at avotau genti de: U.S.A., UK, Germània, Corea de su Mesudii e natzionis chi no ant participau mai a su DMC, che Colòmbia e Cile, chi si-dda funt gherrada beni puru!
Insaras, abetaus a su 17 de Martzu e bireus chini at a passai a su segundu turnu. Nosu bos'eus a donai noas dònnia borta, cun sa speràntzia chi siat una batalla sèmpiri prus potenti e prena de novidadis tènnicas e musicalis.
Lèssicu 0.7
(su) SCIORU: is batallas de digei funt, pruschetotu, una filera de "routine"; sa tradusidura precisa iat a depi essi "andatzu" ma si sciri ca a custu fueddu ddu imperaus in àterus tèssius. Duncas "scioru" podit essi una solutzioni.
(su) AMPARADORI: est su chi ddi nàrant "SPONSOR", chi ndi benit de su latinu "sponsor"=fiantzeri (verbu "spondere"=promiti cun solennidadi). Eus a podi nai "su sponsor" puru ma chi nci-dda faeus a sceberai unu fueddu sardu est mellus.
Batallas de digei in sa retza
Chi imoi seus bivendi s'era de Internet dd'eus cumprendiu de diora e, difatis, est difìcili meda a si pensai de podi cuncordai spainamentu de mùsica-promo, circa de datas po sonai, tenni cuntatus, ecc. chena de imperai sa retza chi, de prus, chi est beni imperada s'at a fai allogai dinai puru! Po unu digei est cosa stravanada a podi fai puru àteras cosas chi donant infogu mannu, ideas e materiali po sonus nous. Tanti po nai:
- imperendi a Skype, MSN opuru calisisiat “sistema de arrecadu subitanu” acapiendi a sa computera una bessida de su mixer (mancai su Booth) e cun d-una webcam si podeus fai una pariga de scratches impari a un'amigu arromanu o spanniolu, faendi “pregunta e arraspusta” e studiendi-ndi is tènnicas in s'interis chi si seus spassiendi, chi siat a su noti cun is cùfias opuru a su domìnigu de a merii cun is càscias a totu pompa;
- imperendi a Soundcloud, po carrigai arregistratzionis e ddas spainai de manera chi totu is cumbidaus a s'ascurtu potzant intendi cantu seus togus a fai passàgius longus unus sessantacuàturu bàtidus;
- scarrighendi-sì "loopers", basis e sonus po fai provas e traballus nous, sèmpiri prus arricus e personalis.
E imoi, arribendi a sa chistioni chi m'at fatu sciriri a custu post, nci at una novidadi manna e stravanada: sa "batalla in sa retza"! No est cosa noa-noa, ca giai de una pariga de annus sa sfida intra de digei, imperendi a Youtube, fiat lompendi a essi cosa sèria e batallas che "WTK Worldwide Scratch Battle" e àteras funt atòbius abetaus de digei famaus puru (Dj Muzzell, LigOne, Kurteek, ecc.) e de unu muntoni de genti, ca a participai est fàcili: ti depis arregistrai cun sa webcam, faendi sa presentada cosa tua, intra de su tempus stabilèssiu e asuba de sa basi "ofitziali". Totu su mundu t'at a podi biri e, a s'acabau, una giuria at a ditzidi chini est su bincidori. E insaras sa DMC-World Dj Championships, chi giai de is annus '80 fait dònnia annu sa prus batalla importanti chi premiat is campionis de su mundu, ocannu at organizau sa primu batalla in sa retza cosa sua: sa DMC ONLINE DJ CHAMPIONSHIP. Chena de intrai tropu in is particularis (ligei-sì s'arregulamentu chi teneis tempus e gana) si potzu nai giai chi totus is assentaus intra de su 14 de Friàrgiu chi ant carrigau su video insoru ant a essi avotaus, inghitzendi de su 3 de Martzu, de totus is chi s'ant assentai po custa tenta. Dònnia duas cidas s'at a avotai, finsas a su 30 de Austu candu ant a essi ofitzialis is 10 sceberaus po sa finali chi, su 5 de Cabudanni, at a nai chini est s'urrei de sa batalla! Deu no mi seu assentau ancora po avotai (siguramenti no bollu batallai, ca no seu bonu a fai custas cosas) ma no biu s'ora de mi gosai sa bisura de genti de totu su mundu amachiendi-sì cun duus pratus e unu mixer e boghendi-ndi sonus stravanaus! Sa batalla, no si-ddu scaresceus, est cosa importanti meda in su mundu de su digei "hip hop"...puru chi est in sa retza!
Lèssicu 0.6
(su) SISTEMA DE ARRECADU SUBITANU: funt totu cussus programas chi pirmitint de comunicai luegus scriendi a tipu "chat" e, po sa prusparti, puru chistionendi-sì cun su micròfunu e is cufias e castiendi-sì cun sa webcam.
(su) BOOTH: est una segundu bessida de su mixer chi, a tipu su Master, arrègulat unu volùmini. In ingresu ddi nant aici ca iat a depi essi sa bessida po is càscias de sa "gabina" de su digei, diferentis de cussas acapiadas a su Master. Cumbenit a ddu lassai aici, comenti as fatu totu is àteras lìnguas.
(sa) PREGUNTA E ARRASPUSTA (P/A): chistionendi de digei chi faint "scratch" est una manera de si sfidai opuru de fai allenamentu, arretroghendi-sì apitzus de una basi dònnia tanti de bàtidus. Su nòmini est tradusidura de s'ingresu "question & answer (Q&A)". In italianu puru s'imperat meda "botta e risposta".
(su) PASSÀGIU: sa transidura intra de una cantzoni e s'àtera candu ddas seus amesturendi-ddas. In italianu est "passagiu" a su pròpiu, ca si cumprendit chi no seus chistionendi de màchinas de su tèssiu.
(su) LOOPER: ndi benit de loop (fueddu chi eus giai biu). Funt progràmas piticus, fatus a "flash" opuru "html" chi tenint unus cantu de loop in d-una fentana fata cun gràfica. Funt pràticus meda, ca su digei podit sceberai e cambiai luegus su loop po fai allenamentu cun su scratch. No ddu furriaus, poita ca, comenti eus biu giai po "loop", ndi bessint girus de fueddus chi trumbullant.