IDA ITALY: THE SCRATCH! Is bincidoris (e deu nau SIMO G)

Is batallas in s'arretza ndi funt bessendi a tipu cardolinu e sa cosa mi fai praxeri meda. Digeis in s'aposentu insoru scarrafiendi, filmendi-sì cun is mìgias pudèscias de apalas, opuru cun sa gatu chi passat e issus sighendi a movi su discu e su crossfader infogaus pèrdius! Est custa sa cosa chi mi praxit de-i custas batallas: su digei scarrafiendi in domu sua, comenti fait de annus candu tenit unu pogheddu de tempus, mancai de a su noti e cun is cùfias po no ndi scirai a su bixinu, scurtzus e totu scrabionaus! E passièntzia chi su vìdiu no est HD e su sonu est peus de unu .mp3 a 128 k, est totu "a stili de realidadi" (agiumai su fragu de is mìgias s'intendit puru!).

Balla, torraus a su tìtulu de s'artìculu chi est mellus! E duncas, s'IDA (International Dj Association) Italy at cuncordau lestramenti custa batalla "de scarràfius sceti", in d-unu vìdiu de 1:30 min. fatu po biri e comenti si moviant is manus apitzus de su mixer e de su pratu. Eriseru, apustis de unu mesi de arricimentu de is vìdius, is giugis (Dj Craim, Mandrayq, B Kun, Drugo e Tayone) ant nau chini funt is bincidoris, est a nai:

Primu: T-Robb (43,5 Puntus)
Segundu: Dj Spada (42,5 Puntus)
Su de tres: Simo G (32,7 Puntus)

Deu, siguramenti, ndi apu a cumprendi prus pagu de is giugis e T-Robb e Dj Spada ant scarrafiau a sa toga diaderus, perou emu a nai chi Simo G assumancu segundu ndi depiat bessiri, chi no primu. Forsis chi est stètia premiada sa lestresa de T-Robb e sa precisioni de Spada ma, chi andaus a castiai, Simo G ddas tenit ambaduas impari a stili meda.

Eh, gei seis malus! Imoi seis pensendi chi seu tifendi a unu piciocu sardu (Simone est sardu e, comenti a un'àteru Ganga -Gabriele- est unu grandu digei e scarrafiadori)...e difatis est aici! Castiai-sì is vìdius e narai-mì chi no tengu arrexoni! Bravu Simo G, po mimi ses su bincidori (e craramenti bravus is àterus puru...cosa de timi de sa potentza scarrafiendi).

At participau un'àteru digei sardu puru, s'amigu Dj Rash chi, perou, no est bintrau itra de is primus tres. Bravu meda issu puru, comenti a totu custa genia noa de digeis sardus chi funt faendi-sì connosci in continenti puru. Ndi eus a chistionai in su benidori.